अछाम जिल्ला अदालतमा १ वर्षमा १ सय ५१ मुद्दा दर्ता

अछाम जिल्ला अदालतमा गत आर्थिक वर्ष २०७७÷०७८ मा विभिन्न घटनाका १ सय ५१ मुद्दा दर्ता भएका छन् ।

जिल्लामा सरकारवादी फौजदारी, व्यक्तिवादी फौजदार, देवानी र पुनरावेदन मुद्दा गरी १ सय ५१ वटा मुद्दा दर्ता भएको अछाम अदालतले जनाएको छ ।

जस मध्ये १ सय १८ वटा मुद्दा फर्छ्योट भएका र ३३ वटा मुद्दा फर्छ्योट गर्न बाँकी रहेका अछाम जिल्ला अदालतका सूचना अधिकारी कमल प्रसाद ढुङ्गानाले जानकारी दिनुभयो । यस्तै अछाममा पछिल्लो समयमा सम्बन्ध विच्छेदका घटनामा वृद्धि भएको छ ।

जिल्लामा हिंसा पीडित महिलाहरू सचेत हुनुले सम्बन्ध विच्छेदका घटनामा वृद्धि भएको जिल्ला अदालत अछामले जनाएको छ । गत आर्थिक वर्ष २०७७÷०७८ को तथ्याङ्कमा अदालतमा सम्बन्ध विच्छेदका १६ मुद्दा दर्ता भएका छन् ।

सम्बन्ध विच्छेदका १६ मुद्दा मध्ये १० वटा फर्छ्योट भएका र ६ वटा बाँकी रहेको जिल्ला अदालत अछामका सूचना अधिकारी कमल प्रसाद ढुङ्गानाले रेडियो बान्निगढीलाई जानकारी दिनुभयो । आर्थिक २०७६÷०७७ मा जम्मा १६ ओटा मात्रै उजुरी दर्ता भएकामा आर्थिक वर्ष २०७७÷०७८ मा १६ उजुरी दर्ता हुनुले अछाममा सम्बन्ध विच्छेदका घटना बढ्दै गएको पुष्टि हुने उहाँले बताउनुभयो ।

रेडियो बान्नीगढीसंग संक्षिप्त कुराकानी गर्दै जिल्ला अदालत अछामका सूचना अधिकारी ढुङ्गानाले सम्बन्ध विच्छेदका घटना वृद्धि हुनुमा जिल्लामा बालविवाह गर्नेको सङ्ख्या बढ्दै जानु र हिंसा भएका महिलाहरू हक अधिकारका बारेमा जागरूक हुँदै जानु प्रमुख कारण भएको बताउनुभयो ।

महिला र पुरुष सचेत हुनुले पनि कसैबाट हिंसा हुने बित्तिकै अलग बस्ने चाहानाले पनि यो क्रम बढी रहेको उहाँको भनाइ छ ।

उहाँका अनुसार अदालतमा दर्ता भएका मुद्धाहरुको १ वर्षसम्म छलफलकै क्रममा हुनेभएकोले सकेसम्म मिलाउने गरी मुद्दाको फर्छ्योट गर्ने गरिएको छ । उहाँले कतिपय मुद्दा कानुनी हिसाबले पनि ढिलो हेर्नु पर्ने भएकोले चाँडो हेर्न नपाइने उल्लेख गर्नुभयो ।