सुदूरपश्चिममा माधव कुमार नेपालको शक्ति कमजोर भएको

महेन्द्रनगर:
नेकपा एमालेको विभाजनमा उपाध्यक्ष भीम रावल तटस्थ बस्दा सुदूरपश्चिममा माधव कुमार नेपालको शक्ति कमजोर भएको छ । एमाले वरिष्ठ नेता नेपालले एमाले समाजवादी पार्टी दर्ताको प्रक्रिया थालेसंगै भीम रावलले त्यसमा साथ दिएका छैनन् ।

सुदूरपश्चिमका प्रभावशाली नेता रावलले एमाले फुटमा अझै कित्ता क्लियर गर्न सकेका छैनन् । एमाले विभाजनमा मध्यमार्गी बाटो समातेर रावल सहित एमालेका दोस्रो तहका नेताहरु एकताको पक्षमा सक्रिय छन् ।

नेपाललाई साथ नदिएर रावल संस्थापन पक्षमै उभिए प्रदेशमा एमाले बलियो बन्ने नेताहरु दाबी गर्छन् । ‘हाम्रो नेता भीम रावल नै हुनुहुन्छ । उहाँ जता जानु हुन्छ । हामीहरु पनि त्यतै जान्छौँ । उहाँ अहिले पनि एकताका लागि अन्तिम कसरतमै हुनुहुन्छ ।’ एमालेका एक सांसदले  भने, ‘संस्थापनतिरै रह्यौ भने प्रदेशमा हाम्रो बलियो पकड रहन्छ ।’

नेपालका विश्वास पात्र मानिएका रावलले नयाँ पार्टी गठनमा साथ नदिए पछि सुदूरपश्चिममा माधव कुमार नेपालको उपस्थिती कमजोर देखिएको हो ।

एमाले उपाध्यक्ष रावलको सुदूरपश्चिममा पार्टी संगठनभित्र बलियो पकड छ । उनी तटस्थ बस्दा अहिले एमाले विभाजनमा सुदूरपश्चिमका धेरै नेताहरु पर्ख र हेरको अवस्थामा छन् ।

सुदूरपश्चिम प्रदेश सभाका बहुमत प्रदेश सांसद अहिले रावलको पक्षमा छन् । सभामुख सहित २५ प्रदेश सांसद रहेको एमालेमा नेपाल समूहमा १७ सांसद थिए भने ओलीको पक्षमा ७ सांसद थिए ।

माधव कुमार नेपालले नयाँ पार्टी गठनका लागि प्रक्रिया थाले पछि उनले सुदूरपश्चिममा शक्ति गुमाएका छन् । माधव समूहका १५ प्रदेश सांसदले नै उनलाई साथ दिएका छैनन् । अहिले उनको पक्षमा दुई प्रदेश सांसद मात्रै उभिएका छन् ।

आन्तरिक मामिला तथा कानूनमन्त्री पूर्णा जोशी र पूर्वउद्योग, वन तथा वातावरणमन्त्री माया भट्टलाई एमाले (समाजवादी)को केन्द्रीय सदस्य बनाइएको छ । ती दुई जना प्रदेश सांसद सुहति सुदूरपश्चिमबाट एमाले समाजवादीमा ६ जनालाई केन्द्रीय सदस्य बनाइएको छ ।

निरादेवी जैरु (डडेल्धुरा), प्रेम आले (डोटी), उर्वादत्त पन्त (कञ्चनपुर) र भानुभक्त जोशी (बझाङ) लाई एमाले समाजवादीमा केन्द्रीय सदस्य चयन गरिएको हो । तर तीमध्ये भानुभक्त जोशीले भने पार्टीमा बस्न अस्विकार गरेका छन् ।

उनले आफ्नो सहमति नलिईनक आफ्नो नाम राखिएको भन्दै सामाजिक सञ्जालमार्फत असहमति जनाएका हुन् । ‘म निरन्तर पार्टीको एकताको पक्षमा लागि रहेको थिएँ र अहिले पनि लागी नै रहेको छु,’ नेता जोशीले भनेका छन्, ‘मेरो सहमति नलिई मेरो नाम नेकपा एमाले (समाजवादी) पार्टीको केन्द्रीय कमिटी सदस्यमा राखिएकोमा मेरो सहमति नभएको जानकारी गराउँछु ।’

राजनीतिक दल विभाजन सम्बन्धी अध्यादेशले प्रदेश सांसद र स्थानीय तहका जनप्रतिनिधिलाई २१ दिनभित्र पार्टी छान्नुुपर्ने सुुविधा दिएको छ । २१ दिनपछि मात्रै एमालेमै रहने प्रदेश सांसद र एमाले समाजवादीमा जाने सांसदको टुंगो लाग्ने देखिन्छ ।

यस्तै एमालेका केन्द्रीय सदस्यमध्ये सुदूरपश्चिमबाट गरिमा शाह, प्रेम आले र निरादेवी जैरुमात्रै एमाले समाजवादीमा गएका छन् । माधव समूहकै भीम रावल, झपट रावल, विक्रम शाही, रामकुमार ज्ञवाली र प्रकाश शाहले भने एमाले छोडेका छैनन् र नेपाललाई साथ पनि दिएका छैनन् ।

एमालेमा अहिले लेखराज भट्ट, कर्ण थापा, महेश्वर पाठक, राजेन्द्र रावल, दीपक देवकोटा, नारदमुनि राना, लालबहादुर विक, लीला भण्डारी, गौरी ओली, पुरनसिंह दयाल, गणेशसिंह ठगुन्ना, लालबहादुर थापा, निरु पाल र भैरव सिंह छन् ।

राष्ट्रियसभामा सुदूरपश्चिमबाट एमालेका चारजना सहभागी छन् । तीमध्ये इन्दु कडरिया विष्ट (कञ्चनपुर), चक्र स्नेही (डडेल्धुरा) र शारदा भट्ट (कैलाली) एमालेमै रहेका छन् । अछामका शेरबहादुर कुँवर नेपाल पक्षलाई साथ दिने बताइएको छ । तर, उनी एमाले–समाजवादीको कमिटीमा अटाएका छैनन् ।

सुदूरपश्चिमबाट प्रत्यक्षतर्फ १६ निर्वाचन क्षेत्रमा एमालेका ११ सांसद निर्वाचित भएका थिए । तीमध्ये ८ जना ओली निकट थिए भने ३ जना माधव समूहका थिए ।

ओली समूहका डोटीका सांसद प्रेम आले अहिले एमाले समाजवादीको केन्द्रीय सदस्य चयन भएका छन् । ओली निकट कैलालीका नारदमुनि राना, कञ्चनपुरका नरबहादुर धामी, बैतडीका दामोदर भण्डारी, बाजुराका लालबहादुर थापा, बझाङका भैरवसिंह, दार्चुलाका गणेश ठगुन्ना र अछामका यज्ञ बोगटी एमालेमै छन् ।

माधव समूहका अछामका भीम रावल, कैलालीका झपट रावल र कञ्चनपुरका दीपकप्रकाश भट्टले एमाले समाजवादीमा साथ दिएका छैनन् ।

एमालेको तर्फबाट समानुपातिकमा प्रदेशका ५ जना सांसद छन् । तीमध्ये ३ जना ओली समूहका थिए भने २ जना माधव समूहका थिए ।

अहिले एमाले समाजवादीमा ३ जना समानुपातिक सांसद छन् भने एमालेमा २ जना रहेका छन् । ओली समूहकी कञ्चनपुरकी सांसद विना बुढाथोकी एमाले समाजवादी रहेकी छन् । यद्यपी उनी पनि कमिटिमा भने अटाएकी छैनन् ।

कैलालीकी लक्ष्मी चौधरी र डडेल्धुराकी निरादेवी जैरु नेपालसंगै छन् । जैरु केन्द्रीय सदस्य हुन् भने चौधरी कमिटीमा छैनन् । ओलीले कारबाही गरेका १४ जनामध्ये चौधरी पनि एक हुन् ।

ओली निकट कञ्चनपुरकी निरु पाल र बझाङकी आशा विक भने एमालेमै यथावत छन् ।
उता एमाले समाजवादीको केन्द्रीय सदस्य चयन भएकी आन्तरिक मामिला तथा कानूनमन्त्री पूर्णा जोशीले नेपालसंग बहुमत सांसद रहेको दाबी गरेकी छन् ।

‘निरुकुशता विरुद्ध माधव नेपाल कमरेडको नेतृत्वमा हामीहरु संघर्षमा होमियौँ । पार्टी एकता होस् भन्ने कामना थियो । त्यसका लागि प्रयासहरु पनि भए तर त्यो सम्भव भएन ।’ उनले  कुरा गर्दै भनिन्, ‘माधव कमरेडले नयाँ पार्टी खोल्ने निर्णयमा हामी पनि त्यसलाई समर्थन गरेका छौँ । प्रदेश सभामा हाम्रो संख्या यथावत छ । राम्रो उपस्थिती छ ।’