बनवासामा नशालुपदार्थ खुवाएर नेपालीलाई लुटपाट

 महेन्द्रनगर :

गड्डाचौकी नाकाबाट एक युवकको उद्धार गरिएको छ । भारतको सिम्लाबाट घर फर्किरहेका उद्धार गरिएकादोधाराचाँदनी नगरपालिका –८ सुन्दरनगरका २९ वर्षीय नरबहादुर बुढालाई गाडीमा लठ्याउने औषधी खुवाई १५ हजार भारु र एक थान मोबाइल लुटेर बनबासामा अलपत्र पारेको अवस्थामा सशस्त्र प्रहरीले उद्धार गरेको हो । बनबासाबाट भारतीय सुरक्षाकर्मीले उद्धार गरी बुढालाई सशस्त्र प्रहरी बल नेपाल बीओपी गड्डाचौकीबाट सीमानाकामा खटिएको टोलीलाई बुझाएको थियो । उनलाई उपचारका लागि महाकाली प्रादेशिक अस्पताल महेन्द्रनगर लगिएको र लुटपाटमा संलग्न समूहको भारतीय सुरक्षाकर्मीसंग आवश्यक समन्वय गरी खोजी कार्य भइरहेको सशस्त्र प्रहरी बल नेपाल नम्बर ३५ गण हेडक्वाटर शैलेश्वरी कञ्चनपुरले जनाएको छ । पछिल्लो समय भारतबाट आउने नेपाली दाजुभाईहरुलाई नशालु पदार्थ खान दिने र पछि लुटपाट गर्ने गरेकाले सचेत रहन जिल्ला प्रहरी कार्यालयले आग्रह गरेको छ ।