कञ्चनपुरमा तिज कार्यक्रममा झगडा हुँदा, ७ जना घाइते, २ पक्राउ

महेन्द्रनगर । कञ्चनपुरमा युवाहरु बिच झगडा पर्दा ७ जना घाईते भएका छन् । तिज कार्यक्रम भएको सामूहिक झडपमा परी ७ जना घाइते भएका हुन् । कृष्णपुर नगरपालिका–१ को भेटघाट शिविरमा तीज कार्यक्रममा शनिबार राति झडप भएको थियो ।
गम्भीर घाइते हुनेमा कृष्णपुर नगरपालिका–१ का अन्दाजी २८ वर्षीय चन्द्रबहादुर धामी, अन्दाजी ३५ वर्षीय नरेन्द्र भण्डारी, ३८ वर्षीय नारायण दमाई र ६५ वर्षीय गोविन्द दमाई रहेको इलाका प्रहरी कार्यालय झलारीका इन्चार्ज कर्णबहादुर बोहराले बताए । टाउकोमा चोट लागेका उनीहरुलाई उपचारका लागि धनगढी ल्याइएको छ ।
यस्तै झडपमा कृष्णपुर नगरपालिका–१ कै बलबहादुर डाँगी, मनोज खत्री र किसन खत्री सामान्य घाइते भएका छन् । उनीहरुको स्थानीय क्लिनिकमा उपचार भइरहेको छ ।

कुटपिट गरेको आरोपमा कृष्णपुर नगरपालिका–१ का विजय भण्डारी र वडा नम्बर २ का प्रेम महरालाई पक्राउ गरिएको प्रहरी निरीक्षक बोहराले बताए । घटनामा अन्य फरार रहेकाहरुको खोजी कार्य भइरहेको उनले बताए । घटना सम्बन्धी अनुसन्धान भइरहेको प्रहरीले जनाएको छ ।