बैतडीमा व्यापारी मृत्यु प्रकरणः ५ जना नियन्त्रणमा

महेन्द्रनगर :

जिल्ला प्रहरी कार्यालय बैतडीले सुर्नया गाउँपालिका व्यापारीको मृत्यु प्रकरणको अनुसन्धानका लागिे पाँच जनालाई नियन्त्रणमा लिएको छ । सुर्नया गाउँपालिकाको सन्सेरीमाण्डौँका व्यापारी कमलसिंह महरा मृत फेला परेपछि सो घटनाको अनुसन्धानका लागि प्रहरीले उनीहरुलाई नियन्त्रणमा लिएको हो । नियन्त्रणमा लिएकाहरुको नाम भने प्रहरीले खुलाएको छैन् ।

उनीहरुलाई नियन्त्रणमा लिएर प्रहरीले थप अनुसन्धान गरिरहेको जिल्ला प्रहरी कार्यालय बैतडीका प्रहरी प्रवक्ता दर्शन खड्काले बताएका छन् । सुर्नयाको सन्सेरीमाण्डौँ बजारमा मासु पसल सञ्चालन गर्दै आएका सुर्नया–४ लेकडाँडाका अन्दाजी ४५ वर्षीय महरा आज मृत फेला परेका थिए ।

उनको शव बिहीबार बिहान स्थानीयले देखेका थिए । मृतक महराको टाउकोमा गम्भीर चोट रहेको प्रहरीले जनाएको छ । मृतकको टाउको, छाति र शरिरका विभिन्न भागमा चोटपटक रहेकाले घटनाको सुक्ष्म ढंगबाट छानविन गरिनुपर्ने स्थानीयले माग गरेका छन् ।