बैतडी व्यापारी हत्या प्रकरणः प्रहरीद्धारा चार जना आरोपित  सार्वजनिक

बैतडी:

बैतडीमा व्यापारी कमलसिंह महराको हत्याको आरोपमा पक्राउ गरिएका चार जनालाई प्रहरीले सार्वजनिक गरेको छ । हत्याको आरोपमा पक्राउ गरिएका रामबहादुर मडै, हरिशसिंह महरा, रामबहादुर महरा र संकरसिंह महरालाई प्रहरीले सार्वजनिक गरेको हो । ७ जना पक्राउ गरिएकोमा ३ जनालाई सामान्य सोधपुछपछि छाडेको प्रहरीले बताएको छ । सार्वजनिक गरिएका ४ जनालाई हिरासतमा राखेर अनुसन्धान सुरु गरिने बैतडी प्रहरीले जानकारी दिएको छ । जिल्ला प्रहरी कार्यालय बैतडीका डिएसपी रमेशबहादुर पालका अनुसार बयानमा अपराधीले वुधवार राती संगै मदिरा पिएको र सामान्य विवादमा गाली गलौज गरेपछि आक्रोसमा आएर खानेपानीको जिआई फलामे पाईपले टाउकोमा हिर्काएर मारेको बताएका छन् । बिहीबार बिहान सुर्नया गाउँपालिका–४ को लेकडाँडा घर भई स्थानीय सन्सेरीमाडौंमा मासु पसल गर्दै आएका ५५ वर्षीय कमलसिंह महरा मृत फेला परेका थिए । कमलसिंहको टाउको, छाती र शरिरका अन्य भागमा चोट लागेको देखिएको छ ।