बाढी प्रभावित तीन सय परिवारलाई खाद्य र गैरखाद्य सामग्री वितरण

महेन्द्रनगर :

बाढीबाट प्रभावित भएका कञ्चनपुरका तीन सय परिवारलाई आज खाद्य र गैरखाद्य सामग्री वितरण गरिएको छ । बाढी प्रभावित समुदायमा मानवीय प्रतिकार्य कार्यक्रम स्टार्ट फण्ड अन्तर्गत मर्सिकोर, केयर नेपाल र निड्स नेपालको सहयोगमा बाढी प्रभावितका लागि खाद्य सहायता भौचर, सरसफाइ स्वच्छता, डिनिटी किट, भान्सा सामग्री र गैर खाद्य सामग्री वितरण गरिएको हो । निड्स नेपालका निर्देशक भवराज रेग्मीका अनुसार पुर्नबास नगरपालिकाका ६८, लालझाडी गाउँपालिकाका १४०, शुक्लाफाँटा नगरपालिकाका ३६, बेदकोटका ७ र कृष्णपुरका ४९ सहित ३०० परिवारलाई राहत सामग्री वितरण गरिएको छ। बाढी प्रभावित परिवारलाई खाद्य सहायता भौचर प्रिपेड कार्ड मार्फत प्रतिघरधुरीलाई ११ हजार २५० का दरले ३०० घरघुरीलाई उपलव्ध गराइएको छ । पोषण सहायता भौचर गर्भवती, सुत्केरी, दीर्घरोगीलाई पाँच हजारका दरले पाँच पालिकाका ९० घरधुरीलाई वितरण गरिएको छ। हाइजिनकिट दुई हजार २७० का दरले १७० घरधुरीलाई, महिला तथा किशोरी सम्मान सामग्री डिगनीटी किट तीन हजार ४८० का दरले ७५ घरधुरीलाई, सार्वजनिक धारा र शौचालय एवं खानेपानी सुविधामर्मत सम्भार पाँच हजारका दरले ४० घरधुरीलाई उपलव्ध गराइएको छ। यसैगरी, खानेपानी स्वच्छताका लागि हाते धारा सुद्धिकरण रु एक हजार २०० का दरले १२० घरधुरीलाई र बाढीका कारण बिग्रेका भत्केका घरको मर्मत सम्भार पाँच हजारका दरले १२५ घरधुरीलाई उपलव्ध गराइएको छ। गैरखाद्य सामग्री भान्सा तथा लत्ताकपडा छ हजार ४०० का दरले १२५ घरधुरीलाई र मनोसामाजिक परामर्श र लैङ्गिक हिंसा न्यूनीकरण सचेतना एक सय घरधुरीलाई दिइएको छ। जसका लागि प्रति घरधुरी दुई हजार ९८० का दरले रकम खर्च गरिएको छ। मछेली नदीको बाढीबाट विस्थापना परेका कृष्णपुर नगरपालिका–२ मछेलीका हरि डगौराले खाद्य र गैर खाद्य सामग्री पाएपछि खुसी भएको बताए। “बाढीबाट घर मर्मत सम्भार, खानेपानीका लागि धारा मर्मत र खाद्य र गैर खाद्य सामग्री एक महिना पुग्ने गरी उपलव्ध गराइएको छ” उनले भने, “विजोग अवस्थामा थियौं। यसले केही राहत महसुस भएको छ।” रासस