बेपत्ता २२ बर्षिय युवक मृत फेला

 महेन्द्रनगर:

कञ्चनपुरमा एक युवा मृत फेला परेका छन् । महाकाली नदिमा नुहाउने क्रममा बेपत्ता भएका भीमदत्त नगरपालिकाका २२ बर्षिय युवक मृत फेला परेका हुन् । बुधवार महाकाली नदीमा नुहाउने क्रममा बेपत्ता भएका भीमदत्तनगरपालिका १२ ऐरीका सुनिल विष्ट शुक्रबार झोलुंगे पुल नजिकै मृत भेटिएका हुन् । बुधबार साँझ भाइरल रोड नजिकै महाकाली नदीमा नुहाउने क्रममा बिष्ट बेपत्ता भएको जिल्ला प्रहरी कार्यालय कंचनपुरले जनाएको छ । प्रहरीलाई विहिवार मात्रै जानकारी आएको र प्रहरीले बिष्टको खोजी गरिरहेको थियो । बुधबार दिउँसो विष्ट घरबाट श्रीमतीलाई महेन्द्रनगर बजार छोड्न निस्केका थिए । ऐरी चौराहाबाट श्रीमतीलाई अटोमा बसाएर उनी महाकालीतर्फ लागेका थिए । उनको शव वडा ११ र १२ को सिमाना पर्ने महाकाली नदीमा फेला परेको हो । मृतक आफन्तका अनुसार छिमेकी साथी प्रेम भट्टले बेलुका ५ बजे पछि महाकालीमा नुहाउन जान भन्दै बोलाएको खुलेको छ । श्रीमतिलाई महेन्द्रनगरका लागि अटो रिक्सामा बसाएपछि साथी भट्टसंगै महाकाली नदी तर्फ गएका थिए । प्रहरीले प्रेम भट्टलाई नियन्त्रणमा लिएर अनुसन्धान शुरु गरेको छ । उनले संगै नुहाउन गएको प्रहरीलाई प्रारम्भिक बयान दिएको प्रहरीले जनाएको छ । घट्नाबारे थप अनुसन्धान भइरहेको जिल्ला प्रहरी कार्यालयले जनाएको छ ।