हात्ती पीडितले राहतको माग गर्दै नगर प्रमुखलाई ज्ञापन पत्र

महेन्द्रनगर:

कञ्चनपुरको पुनर्वास नगरपालिकाका किसानहरुले भारतिय हात्तीबाट पिडित भएको भन्दै राहतको लागि नगर प्रमुखलाई ज्ञापन पत्र बुझाएका छन् । वर्षेनी भारतीय दुधुवा नेश्नल पार्कबाट आउने जंगली हात्तीहरुले पीडित बनाउँदै आएको र यस वर्ष पनि पुनर्वास–८ र ९ का केही स्थानहरुमा असोज २४ गते आएको जंगली हात्तीको बथानले किसानका खेतमा लगाएको उखु नष्ट गरेको पुनर्वास नगरपालिका –९ का कृषक करन ऐडीले बताए । यस क्षेत्रको सो समस्या समाधानका लागि तिनै तहका सरकारलाई बारम्बार डेलीगेशनसहितको टोलीले ज्ञापनपत्र बुझाउँदा पनि हालसम्म सरकार पक्षबाट कुनै किसिमको निकास नहुँदा किसान झनै पीडित बनेका कृषक ऐडीले गुनासो गरे । उनले सरकारको ढिलासुस्तीका कारण खेतीबाली मात्रै नभई मानवीय क्षति समेत व्यहोर्नु परेको बताए ।