कांग्रेसको प्रदेश अधिवेशनको प्रक्रिया शुरु, सात जना आकाङ्क्षीहरू

महेन्द्रनगर:

नेपाली कांग्रेसको प्रदेश तहको संरचना चयनका लागि आजबाट प्रदेश अधिवेशनको प्रक्रिया शुरु भइरहेको छ । नेपाली काँग्रेसको १४ औँ महाधिवेशन अन्तर्गत प्रदेश अधिवेशन सुरु हुनै लाग्दा सुदूरपश्चिम प्रदेशमा सभापतिका सात जना आकाङ्क्षीहरू अघि बढेका छन् । निर्वाचन समितिले सार्वजनिक गरेको कार्यतालिका अनुसार सातै प्रदेशमा आज प्रदेश अधिवेशनका लागि मतदाता नामावली प्रकाशित हुँदैछ । बिहीबार दिउँसो १ बजे धनगढीको ओम पार्टी प्यालेसमा प्रदेश अधिवेशन उद्घाटन हुने कार्यतालिका रहेको प्रदेश अधिवेशन प्रचारप्रसार समिति संयोजक नृपबहादुर सुनारले जानकारी दिए । उनका अनुसार बिहीबार प्रदेश अधिवेशन उद्घाटन हुने र यस्तै भोलि शुक्रवार मनोनयन गरेर शनिवार मतदान हुने कार्यतालिका छ । सुदूरपश्चिम प्रदेशमा सभापति बन्ने दौडमा नरनारायण शाह मनु, हिमबहादुर रावल, अर्जुनजंगबहादुर सिंह, पुष्पबहादुर शाही, गोविन्दबहादुर शाह, वीरबहादुर बलायर र भरतबहादुर खड्का गरी सात जना अघि बढेका छन् ।