बडुवालका हत्यारालाई गोली हान्न माग सहित कैलाली जिल्ला अदालतमा प्रदर्शन

महेन्द्रनगर । कैलालीमा लम्कीचुहा नगरपालिका–१ का भूपेन्द्र बडुवालका हत्यारालाई कारबाही गर्न माग गर्दै प्रदर्शन गरिएको छ । सोमवार बडुवालका आफन्तहरुले कैलाली जिल्ला अदालत अगाडी (गेट) मा प्रदर्शन गरेका हुन् ।
उनीहरुले ‘हत्याराहरूलाई कारबाही गर, मान्छे मार्न पाइदैन, न्यायालय बिक्नु हुदैन’ भन्ने नारासहित प्रदर्शन गरेका थिए । उनीहरुले फरार अभियुक्तहरुलाई इन्काउन्टर गर्न समेत माग गरेका छन् । भूपेन्द्रले न्याय पाउनुपर्ने उनीहरुको माग छ ।
कात्तिक २३ गते मंगलवार राति लम्कीचुहा नगरपालिका–१ का भूपेन्द्र बडुवालको हत्या भएको थियो । हालसम्म बडुवालको हत्या प्रकरणमा पक्राउ परेका ९ जना पुर्पक्षका लागि कारागार चलान भएका छन् । अन्य ३ जना भने धरौटीमा छुटेका छन् । यस्तै हत्या अभियोगी ९ जना भने अझै फरार छन् ।