शुक्लाफाँटाका ५ खेलाडी एसियन कराँते प्रतियोगिता खेल्न नयाँदिल्ली प्रस्थान

महेन्द्रनगर । कञ्चनपुरबाट भारतमा हुने ‘एसियन सिख गेम २०२१’ कराँते प्रतियोगितामा सहभागी हुन ५ खेलाडी नयाँदिल्ली प्रस्थान गरेका छन् । शुक्लाफाँटा बुदोकैदो कराँते शाखा गणेशपुरबाट ५ जनाले प्रतियोगितामा सहभागिता जनाउने भएका छन् ।
शुक्लाफाँटाबाट रोहित विष्ट (२४), जितेन्द्र विष्ट (२८), वासुदेव खडायत (३२), मनिष जोशी (४०), पवन बोहरा (४४) ले प्रतियोगितामा प्रतिस्पर्धा गर्ने शाखा प्रमुख प्रशिक्षक लक्ष्मण बोहराले जानकारी दिएका छन् ।
उनका अनुसार प्रतियोगिता २९, ३० र ३१ डिसेम्बरमा हुने भएको छ । नेपाल बुदोकैदो फुल कन्ट्याक्ट संघ (नेपाली मार्सलआर्ट) अन्तर्गत देशैभरबाट ३० जना नयाँदिल्ली प्रस्थान गर्दा शुक्लाफाँटाबाट ५ जना सहभागी हुँदैछन् ।
शुक्लाफाँटाका खेलाडीलाई शुक्लाफाँटा नगरपालिकाको १ नम्बर वडा कार्यालयले बिदाइ गरेको छ । वडाध्यक्ष हरिश विष्टले खेलाडीलाई शुभकामना समेत दिएका छन् ।