बोहराको हत्यामा संलग्न रहेको आरोपमा एक जना पक्राउ

महेन्द्रनगर । बैतडीमा हत्या आरोपमा एक जना पक्राउ परेका छन् । सिगास गाउँपालिका–८ का ५५ वर्षीय कटक बोहराको हत्यामा संलग्न रहेको आरोपमा सिगास–७ का ३० वर्षीय रमेशसिंह ऐरलाई पक्राउ गरिएको हो ।
गत मंसिर १३ गते राति कालपोखरी मन्दिरको जात्रा हेर्न गएका बोहरा मंसिर १४ गते मृत फेला परेका थिए। उनको शरीरमा घाउचोट देखिएकाले हत्याको आशंका गर्दै आफन्तले प्रहरीमा निवेदन दिएको आधारमा उनलाई पक्राउ गरिएको इलाका प्रहरी कार्यालय पाटनका प्रमुख प्रहरी निरीक्षक राजेश शाहीले बताए ।
निवेदनपछि अनुसन्धान थालेको प्रहरीले घटना भएको भोलिपल्ट देखि फरार रहेका ऐरलाई सोमबार साँझ पक्राउ गरेको हो ।
प्रहरीका अनुसार ऐरले मंसिर १३ गते राति बोहरासँग विवाद भएको र सो बेला कुटपीट गरेको स्वीकार गरेका छन् । उनीमाथि थप अनुसन्धान भईरहेको प्रहरीले जनाएको छ ।