पहाडी जिल्लामा हिमपात,जनजिवन कष्टकर

महेन्द्रनगर:

एक्कासी चिशो बढेसंगै सुदूरपश्चिमका पहाडी जिल्लामा हिमपात भएको छ । पहाडी ७ जिल्लाका बिभिन्न उच्च लेकाली क्षेत्र र सदरमुकाममा हिमपात भएपछि जनजिवन कष्टकर भएको छ । डडेल्धुरा, बैतडी, बाजुरा, दार्चुला, बझाङ्ग लगायतका जिल्लाका विभिन्न स्थानमा हिमपात भइरहेको हो । डडेल्धुरा सदरमुकाममा मंगलबार साँझ ७ बजे पछि देखि पानी परे सँगै हिउँ पर्न सुरु भएको थियो । आलिताल गाउँपालिका–१ मेलखर्क, हगुल्टे र गन्यापधुरा गाउँपालिका–१ शाहुखर्क क्षेत्रमा हिमपात भए पछि भिमदत्त राजमार्गमा यातायातका साधन सञ्चालन हुन सकेका छैनन् । बैतडीको ढोल्यामोड, खोड्पे, सतबाँझ लगायतका स्थानमा हिमपात भइरहेको जिल्ला प्रहरी कार्यालय बैतडीका प्रहरी निरीक्षक दर्शन खड्काले बताए। जिल्लाका केही स्थानमा हिजो साँझ देखि र केही स्थानभमा आज बिहान देखि हिमपात भइरहेको उनले बताए । यस्तै, बाजुरामा पनि हिमपात भइरहेको छ । जिल्लाका हिमाली गाउँपालिका, बुढीनन्दा, स्वामीकार्तिक गाउँपालिका, बडीमालिका नगरपालिकाका विभिन्न स्थानमा हिमपात भइरहेको जिल्ला प्रहरी कार्यालय बाजुरका प्रहरी नायब उपरीक्षक चतुर्भुज ओझाले बताए । डडेल्धुरा, बैतडी, बाजुरा लगायतका जिल्लाका उच्च लेकाली भेगमा हिमपात भए सँगै चिसो बढ्दा जनजीवन प्रभावित बनेको छ ।