घुस लिएको आरोप लागेका सशस्त्र प्रहरीका सई मुख्यालय तानिए

महेन्द्रनगर:

कञ्चनपुरमा तस्करबाट घुस लिएको आरोप लागेका सशस्त्र प्रहरीका सई वीरेन्द्र चन्द मुख्यालय तानिएका छन् । पुनर्वास नगरपालिकामा रहेको सशस्त्र प्रहरी बल बीओपी आपतालका प्रमुख सशस्त्र प्रहरी नायब निरीक्षक (सई) वीरेन्द्र चन्दलाई शनिबार एक भारतीय तस्करबाट घुस लिएको आरोप लागेको हो । उनलाई शनिबार साँझ भारतीय बजार बसहीबाट मोटरसाइकलमा हार्डवेयरका सामान ल्याएका मुन्ना गुप्ता नाम गरेका भारतीय तस्करबाट ५० हजार रकम घुस लिई छोडिदिएको आरोप लागेको थियो । आरोपपछि सई चन्दलाई डीआईजी कार्यालय बाहिनी मुख्यालय कैलाली तानिएको बताइएको छ । तस्करले मोटरसाइकलमा हार्डवेयरको सामान बोकेको रे उसलाई पछ्याउने क्रममा सामान छोडेर भागेको सई चन्दको बयान रहेको छ उनले २८ हजार मूल्य बराबारको उक्त सामान त्रिनगर भन्सार कार्यालय कैलालीमा बुझाइसकेको बताए । चन्दलाई आपताल बिओपीमा काम गर्न थालेको एक हप्तामै घुस लिएर तस्कर भगाएको आरोप प्रहरीभित्रैबाट लागेको हो ।