गर्भवती श्रीमतीलाइ बलात्कार गरेका श्रिमानलाई साढे तीन वर्ष कैद

महेन्द्रनगर । अछाममा गर्भवती श्रीमतीलाई कुटपिट र यातना दिई बलात्कार गरेको अभियोग लागेका युवकलाई उच्च अदालत दीपायलले साढे तीन वर्ष कैदको फैसला सुनाएको छ । बैवाहिक बलात्कारका आरोपितलाई तीन बर्ष ६ महिना कैद सजाय सुनाएको हो ।
२०७७ असोज २३ गते सुतिरहेको अवस्थामा आफूलाई बलात्कार गरेको भन्दै महिलाले श्रीमानविरुद्ध जाहेरी दिएकी थिइन् । पीडितका साक्षीका रुपमा छिमेकीहरुले जबर्जस्ती करणी भएपछि गुहार मागेको भनी बयान दिएका थिए । तर युवकले भने सहमतिमै यौन सम्पर्क गरेको बयान दिएका थिए ।
०७७ माघ २६ गते जिल्ला अदालत अछामले पीडितका श्रीमानलाई सफाइ दिएको थियो । सोमबार उच्च अदालत दिपायलका का.मु.मुख्य न्यायाधीश टेकनारायण कुँवर र न्यायाधीश जगतबहादुर थापाको इजलासले जिल्ला अदालतको उक्त फैसला उल्ट्याउँदै कैदको फैसला गरेको हो ।