बाजुरामा दलित सेल डेस्क स्थापना

महेन्द्रनगर । बाजुरामा दलित सेल डेस्कको स्थापना गरिएको छ । जिल्ला प्रहरी कार्यालय बाजुरामा दलित सेल (डेस्क) स्थापना गरिएको हो । जिल्लाका दलित समूदायका पिडितहरुको न्यायमा सहज पहुँच गर्ने उद्देश्यले जिल्ला प्रहरी कार्यालय बाजुरामा दलित सेल (डेस्क) स्थापना गरिएको प्रहरी प्रमुख चर्तुभुज ओझाले जानकारी दिएका छन् ।

जिल्ला प्रहरी कार्यालय बाजुराले एक अन्तरिक्रया कार्यक्रम गरेर प्रहरी कार्यालय भित्र स्थापना गरिएको दलित सेल (डेस्क) को भुमिका, काम र कर्तव्यका बारेमा बाजुरा जिल्लाका दलितका अगुवाहरुलाई जानकारी गराएको हो ।

अन्तरक्रिया कार्यक्रममा प्रहरी कार्यालय भित्र दलित सेल (डेस्क) स्थापनापछि यहाँका दलित समुदायका पिडितलाई समन्वय÷सहयोग, अनुसन्धानमा सहजीकरण, दलित माथि हुने हिंसा न्युनिकरण र दलित हकहितको संरक्षण गर्न दलित सेल डेस्कको मुख्य भुमिका रहने प्रहरी प्रमुख ओझाले बताएका छन् ।

त्यस्तै कार्यक्रममा दलित समुदायसंग जोडिएका कानुनहरुको बारेमा जिल्ला प्रहरी कार्यालय बाजुराका प्रहरी सहायक निरिक्षक नारायणसिंह नेगीले जानकारी गराएका थिए ।