कैलालीमा कुटपिटबाट एकको मृत्यु, चारजना पक्राउ

महेन्द्रनगर । कैलालीमा दुई समुह बिच विवाद भएपछिको कुटपिटमा एक युवकको मृत्यु भएको छ । भजनी नगरपालिका–९ स्थित एक विवाह समारोहमा झडप हुँदा सोही ठाउँ बस्ने २५ वर्षिय बसन्त चौधरीको मृत्यु भएकोे हो ।
जिल्ला प्रहरी कार्यालय कैलालीका डिएसपी बेदप्रकाश जोशीका अनुसार बसन्तसहित सोही ठाउँ बस्ने २० वर्षिय लक्ष्मण बराल, २३ वर्षिय किशन बडैला, २३ वर्षिय प्रदिप कार्की र २५ वर्षिय दिपक अवस्थी लगायतका व्यक्तिहरूका बीच नाचगान गर्नेक्रममा विवाद भएको थियो ।
कुटपिटले गम्भीर घाइते भएका बसन्तलाई घोडाघोडी अस्पताल सुख्खड पु–याइएको थियो । त्यहाँ सम्भव नभएपछि कोहलपुरस्थित मेडिकल कलेज लगिएकोमा उपचारका क्रममा उनको आइतवार राती मृत्यु भएको डिएसपी जोशीले बताए । प्रहरीले ४ जनालाई पक्राउ गरी थप अनुसन्धान गरिरहेको जनाएको छ ।