पत्रकार भण्डारीले २५ निवेदनमार्फत् मागे झण्डै एक सय जानकारी

महेन्द्रनगर । मानसखण्ड दैनिकका सम्पादक खेम भण्डारीले विगत पाँच वर्षमा भीमदत्त नगरपालिकाले गरेका कामबारे जानकारी लिन सूचनाको हक प्रयोग गरी करिब एक सय विषयमा सूचना माग गरेका छन् । भण्डारीले २५ निवेदनमार्फत् ती जानकारी माग गरेका हुन् । १८ फागुनमा भण्डारीले निवदेनहरु दर्ता गराएका हुन् ।
नेपालको संविधानको धारा २७ तथा सूचनाको हक सम्बन्धि ऐन, २०६४ को दफा ३ र ७ अनुसार जनताको जान्न पाउनु पर्ने हकको सम्वर्धनका लागि सूचना माग गरिएको छ ।
मागिएका सूचनामा २०७४÷०७५ यता गरिएको भवन निर्माणको विवरण, भवन निर्माणको शीर्षकगत खर्च विवरण, आव २०७३÷०७४ सम्मको कूल बेरुजु रकम, आव २०७४÷०७५ यताको वार्षिक बेरुजु रकम, बेरुजु फर्छयौट अवस्था तथा बेरुजु फछ्र्यौटमा भएको प्रशासनिक खर्च, छाडाचौपाया नियन्त्रणमा भएको खर्चको शीर्षकगत विवरण माग गरिएको छ ।
यस्तै, कोरोना भाइरस महामारी नियन्त्रणमा गरिएको खर्चको पूर्ण विवरण, आव २०७४।०७५ यता निर्माण गरिएका डिपिआरको विवरण, डिपिआर बनाउँदा इन्जिनियरिङ फर्मलाई भुक्तान गरिएको रकमको शीर्षकगत
विवरण, विज्ञ तथा सल्लाहकारको सेवा प्राप्त गर्न गरिएको खर्चसहितको पूर्ण विवरण, खरिद गरिएका सेवा तथा परामर्शको खर्चसहितको पूर्ण विवरण, वार्षिकगत आन्तरिक आय विवरण, वार्षिकगत रुपमा आन्तरिक आयको खर्च विवरणको माग गरिएको छ ।
यसैगरी, जैविक मार्ग निर्माणमा भएको शीर्षकगत खर्चको विवरण, पर्यटन मार्ग निर्माणको शीर्षकगत खर्च, फोहर व्यवस्थापन केन्द्रका लागि गरिएको खर्च रकमको शीर्षकगत विवरण, शुक्लाफाँटा महोत्सव र अन्य महोत्सव तथा मेलाको खर्च विवरण, विज्ञापन शीर्षकमा गरिएको खर्चको पूर्ण विवरण, दान तथा चन्दामा गरिएको खर्चको पूर्ण विवरण, गैरसरकारी संस्थासँगको साझेदारीको पूर्ण विवरण, बोलपत्र नगरी दरभाउपत्रबाट गरिएका कार्यको पूर्ण विवरण माग गरिएको छ ।
यसैगरी, आव २०७४÷०७५ यता निर्माण गरिएका ग्रावेल सडकको विवरण र खर्च, कालोपत्रे सडकको खर्चसहितको विवरण, आव २०७४।०७५ पूर्व महाकाली नदी रोयल्टी संकलनको अवस्था, आव २०७४।०७५ यता महकाली नदी रोयल्टी आयको वार्षिकगत विवरण, वार्षिकगत रुपमा सडकबत्तीका लागि गरिएको खर्च विवरण, दिइएका सबैखाले अनुदानको पूर्ण विवरण, भ्रमणभत्ता तथा दैनिक भत्तामा गरिएको खर्चको पूर्ण विवरण, खरिद गरिएका सवारीसाधनको विवरण र खर्च रकमको सूचना माग गरिएको छ ।
यस्तै, आव २०७४।०७५ यता खरिद गरिएका निर्माणसम्बन्धी भारी उपकरणको विवरण र खर्च रकम, वार्षिकगत रुपमा इन्धन खर्च विवरण, ज्यालादारी कर्मचारीको विवरण, ज्यालादारी कर्मचारीको पारिश्रमिकमा भएको खर्चको विवरण लगायतका सूचना माग गरिएको छ ।
मागेका सूचना कानुनले तोकेको समयभित्रै प्राप्त हुनेमा आफू विश्वस्त रहेको भण्डारीले बताए । उनले सूचना दिँदा तोडमरोड नगरिने र मागिएका सूचनाको विश्लेषणबाट भीमदत्त नगरपालिकाको पाँच वर्षे कार्यकालको प्रष्ट तस्विर सार्वजनिक बताए ।
सूचनाको हक सम्बन्धी कानुनअनुसार नगरपालिकाले १५ दिनभित्र मागिएको ढाँचामा सूचना दिनुपर्छ । सूचना दिन आनाकानी गरे आफू कानुनअनुसार अगाडि बढ्ने भण्डारीको भनाई छ ।