भीमदत्त नगरपालिका गहिरो निन्द्रामा सुत्यो ? 

महेन्द्रनगर । कञ्चनपुर जिल्लाको सदरमुकाम भीमदत्त नगरपालिकामा नवनिर्वाचित नगर प्रमुख (मेयर) र उपप्रमुख (उपमेयर)को आलोचना हुन थालेको छ ।

नेपाली कांग्रेसबाट निर्वाचित मेयर पदम बोगटी र उपमेयर निलम लेखक जोशीको नेतृत्वमा नगर क्षेत्रमा कुनै नयाँ काम हुन नसकेपछि नगरवासीले आलोचना थालेका हुन् ।

निवर्तमान मेयर सुरेन्द्र विष्टको पालामा सुरु भएका विकास परियोजनाको बाँकी काममा गुणस्तर काम गराउन समेत मेयर, उपमेयर असफल भएका पाइएको छ । महेन्द्रनगरमा सञ्चालित शहरी विकास परियोजनाको सडक, ढलनिकास निर्माण कार्यमा गुणस्तर कायम हुन नसकेको समाचारमा आइसकेको छ । निवर्तमान मेयर विष्टको पालामा थालिएका नगर चक्रपथ, अन्य कालोपत्रे सडकको निरन्तरतालाई पनि वर्तमान नेतृत्वले अगाडि बढाउन सकेको छैन ।

नगरपालिकाको नयाँ नेतृत्वको काम नदेखिएपछि स्थानीय अभियन्ता खेम भण्डारीले सामाजिक सञ्जाल फेसबुकमा लेखेका छन्, ‘हेलो भीमदत्त नगरपालिका ! ‘आर यू अलाइभ’ ? निन्द्राबाट ब्यूँझाउने काम हामीले नै गर्नुपर्ने हो कि क्या हो ?’ उनले नगरपालिकाको नेतृत्व निन्द्रामा सुतेको संकेत गरेका छन् ।

कार्यकारी अधिकारसहित संविधानले कल्पना गरेको भीमदत्त स्थानीय सरकार निरीह अवस्थामा देखिएको छ । मेयर, उपमेयरले नयाँ नेतृत्वको नयाँ योजना र रचनात्मक काम देखाउन सकेका छैनन्, साथै पुरानै कामलाई पनि पूर्णता दिन तदारुकता देखाएका छैनन् ।

नगरको काममा ध्यान नदिई नगर बाहिरका विभिन्न ठाउँमा पुगेर फोटो खिचाउँदै सामाजिक सञ्जालमा राख्ने गरेका छन् । भीमदत्त नगरपालिकाले नगर विकास समितिको जग्गामा बनेका घर तथा बजारलाई हटाउन पहल गर्नमा समय दिन नपाएको देखिन्छ ।

नगर क्षेत्रमा नक्सा पास विना नै सरकारी जग्गामै घरहरू बन्दा समेत स्थानीय सरकार रमितै बनेको छ । बजार क्षेत्रमा बनेका फूटपाथहरू स्थानीय पसलको सामान राख्नमा ठिक्क बनेका छन्, जसले गर्दा पैदल यात्रुलाई अप्ठ्यारो हुने गरेको छ । ठूला व्यापारीले फूटपाथ कब्जा गरेको नदेख्ने नगरपालिका गरीबले गुडाएका ठेलागाडा भन्ने देख्ने गर्छ । गरीबका ठेलागाडा सञ्चालनमा भीमदत्तका नगर प्रहरीले अवरोध गर्ने गर्छन् ।

नगरपालिका अगाडि बन्दै गरेको सडक क्षेत्रमा बिजुलीका पोलदेखि खानेपानीका पाइपहरू अस्तव्यस्त रूपमा छाडिएका छन् तर सरोकारवाला निकायको आँखा त्यसतर्फ पुगेको देखिँदैन ।

नगरपालिका क्षेत्रको बेथितिबारे सोध्दा उपमेयर निलम लेखक जोशीले धेरै कार्यक्रममा जानुपर्ने भएकाले केही नदेखिएको बताइन् । ‘उपमेयरको धेरै कार्यक्रम र जिम्मेवारी छन्, धेरै काम हुनाले केही नदेखिएको हुनसक्छ,’ उनले भनिन्, ‘हामीसित जनशक्तिको पनि कमी छ, केही काम कार्यान्वयन प्रक्रियामा छौं ।’