पछिल्लो समय नेपालमा भारतीय चलचित्र र वेब सिरिजको छायांकन बढ्दै

काठमाडौँ:

पछिल्लो समय नेपालमा भारतीय चलचित्र र वेब सिरिजको छायांकन बढ्दै गएको छ । अङ्ग्रेजी भाषामा निर्माण भएका वृत्तचित्रका लागि नेपाल छायाँकन स्थल भए पनि यहाँ सुटिङ हुने भारतीय चलचित्रको सङ्ख्या भने खासै बढ्न सकेको थिएन । दुई वर्षअघि चलचित्र ‘उँचाई’को एक महिना नेपालमा छायांकन गरिएको थियो । अमिताभ बच्चन, अनुपम खेर, ड्यानी डेन्जोङपा बोमन इरानी र परिणीति चोपडा जस्ता लोकप्रिय भारतीय कलाकारहरूको अभिनय रहेको यस फिल्ममार्फत देशले धेरै आवश्यक प्रचार पायो।

आजकल भारतीय चलचित्रसँगै टिभी सिरियलको पनि सुटिङ नेपालमा भइरहेको छ । केही समयअघि भारतीय चलचित्र ‘मिराई’को छायाँकन काठमाडौँमा गरिएको थियो । त्यस्तै भारतीय निर्देशक अनुभव सिन्हाले पनि काठमाडौंदेखि पोखरासम्म १० दिनसम्म एक सिरिजको छायाङ्कन गरेका थिए ।

चलचित्र विकास बोर्डको तथ्याङ्कअनुसार चालू आर्थिक वर्ष २०७९/८० को नौ महिनामा नेपालमा ४५ भन्दा बढी विदेशी चलचित्रको छायाँकन भएको छ । पछिल्लो ६ वर्षको तथ्याङ्कअनुसार नेपालमा करिब २४३ विदेशी चलचित्र, वेब सिरिज र वृत्तचित्रको छायाङ्कन भएको छ ।