भीमदत्त बाटिकाको विवाद नयाँ मोडतिर, प्रशान्त भट्टलाई मिल्यो जिम्मेवारी

महेन्द्रनगर । कञ्चनपुरको महेन्द्रनगरस्थित भीमदत्त बाटिकामा खनजोत गरिएपछि उत्पन्न विवादले नयाँ मोड लिएको छ ।

वडा कार्यालयलाई जानकारी नै नदिई नगरपालिकाको निर्देशनमा खनजोत भएपछि विवाद भएको थियो । नगरपालिकाले खनजोत गरेर फूलखेती गर्न खोजेको थियो ।

भीमदत्त नगरपालिकाको १८ नम्बर वडाभित्र पर्ने भीमदत्त बाटिकाको संरक्षणका लागि वडाध्यक्ष रविन्द्रप्रसाद देवकोटाले ‘भीमदत्त बाटिका संरक्षण समिति’ गठन गरेका छन् । समितिको अध्यक्षमा निवर्तमान वडा सदस्य प्रशान्त भट्ट मनोनित भएका छन् ।

समितिको सदस्यमा गंगादत्त भट्ट, नन्दराम जोशी, गोविन्द विष्ट, बबिता सिनाल, राजकुमारी थारु, ईश्वर जोशी, प्रकाश भट्ट, प्रेमसिंह सामन्त, रञ्जना थापा रहेका छन् भने सदस्य सचिवमा प्रभूनिधि पन्त मनोनित भएका छन् ।

वडाध्यक्ष देवकोटाले नगरपालिकालाई पत्राचार गर्दै समिति गठन भएको जानकारी दिएका छन् । पत्रलाई नगर प्रमुखको सचिवालयमा बोधार्थ दिइएको छ ।