रक्सी खाएर मात्तिएका प्रेस संयोजकको गुण्डागर्दी ! सरकारी गाडी दुरुपयोगको भिडियो ‘डिलिट’

महेन्द्रनगर । कञ्चनपुरको भीमदत्त नगरपालिकाका मेयर पदम बोगटीका प्रेस संयोजक चक्र महता रक्सी खाएर गुण्डागर्दीमा उत्रिएका छन् ।

पश्चिम आज डटकमका सम्पादक तथा पत्रकार भुपी उपाध्यायले नगरपालिकाको सरकारी गाडी दुरुपयोगको भिडियो बनाउँदा उनीमाथि दुर्व्यवहार गर्दै प्रेस संयोजक महताले भिडियो ‘डिलिट’ गराएका छन् ।

असार २५ गते राति १० बजे भीमदत्त नगरपालिका–३ भाँसीमा रहेको सोराइ कटेजमा सरकारी गाडीसहित मेयर बोगटी, वडाध्यक्ष गगन धामी र प्रेस संयोजक महता रहेको बेला पत्रकार उपाध्यायले भिडियो खिचेका थिए । रातिको बेला सरकारी गाडी दुरुपयोग गर्दै कटेज गएर रक्सी खाइरहेको बेला पत्रकार उपाध्यायले गाडीको भिडियो खिचेका थिए ।

सरकारी गाडी दुरुपयोग भइरहेको बेला खिचेको भिडियो संयोजक महताले गुण्डागर्दी शैलीमा डिलिट गराएकोप्रति नेपाल पत्रकार महासंघ कञ्चनपुर शाखाको ध्यानाकर्षण भएको छ । जिल्ला शाखाका सचिव राजेन्द्रप्रसाद अवस्थीले बुधवार प्रेस विज्ञप्ति जारी गर्दै कानूनी कारवाही गर्न र सुरक्षाको प्रत्याभूति गराउन माग गरेका छन् ।

मेयर बोगटी सहितको टोली रातिको समयमा म१झ १०८ नम्बरको सरकारी गाडीसहित कटेज पुगेको थियो । सञ्चारकर्मीमाथि गुण्डागर्दी शैलीमा व्यवहार गर्नु खेदजनक भएको महासंघले जनाएको छ ।

यस्तै प्रेस चौतारी नेपाल कञ्चनपुर शाखाका अध्यक्ष लक्ष्मण पन्तले प्रेस विज्ञप्ति जारी गर्दै दोषीमाथि कारवाहीको माग गरेका छन् ।