कर्णाली पुलको यातायात अवरुद्ध : ट्रकमा आगलागी, सपोर्ट तारमा क्षति

कर्णाली:

सोमबार ट्रकमा आगलागी हुँदा १४ सपोर्ट तारमा क्षति पुगेपछि कर्णाली पुलमा यातायात अवरुद्ध भएको छ ।

सडक डिभिजन कार्यालय नेपालगन्जले विशेष प्राविधिक टोलीले विस्तृत अनुगमन नभएसम्म पुलमा सवारीसाधन नचलाउन सुझाव दिएको जानकारी दिएको छ ।

डिभिजन कार्यालयका इन्जिनियर निरज शाक्यले पुलमा सवारी आवागमन केही समयका लागि रोकिएको र थप निरीक्षणका लागि थप प्राविधिक टोली खटाइएको बताए । इलाका प्रहरी कार्यालय चिसापानीका प्रहरी निरीक्षक हरिराम डाँगीले नियमित रुट बन्द भएकाले वैकल्पिक बाटोमा जान चालकलाई आग्रह गरेका छन् ।

सुदूरपश्चिम प्रदेशबाट संघीय राजधानी काठमाडौंलगायत अन्य प्रदेशतर्फ जाने सवारी साधनलाई बर्दिया र नेपालगञ्ज हुँदै सत्तीपुर पुल हुँदै बाटो प्रयोग गर्न सुझाव दिइएको छ । सोमबार दिउँसो पश्चिमतर्फ जाँदै गरेको ना ५ ख ५२९७ नम्बरको ट्रकमा आगलागी भएपछि पुलको निर्माणाधीन तारमा आगो फैलिँदा सर्वसाधारणमा त्रास फैलिएको थियो ।