भीमदत्तका जनता विपदमा रोइरहँदा उपमेयर लेखकको काठमाडौंमा रमझम !

महेन्द्रनगर:

कञ्चनपुरको भीमदत्त नगरपालिकामा गत असारमा भएको बाढी र ढुबानले प्रभावित नगरवासीले राहत, क्षतिपूर्ति र पुनःस्थापनाको पर्खाइमा रहेका बेला नगर उपप्रमुख (उपमेयर) निलम लेखक जोशी काठमाडौंमा रमझममा रहेको भिडियो बाहिरिएको छ ।

जनता विपदमा परेर रोइरहेको अवस्थामा उपमेयर लेखक जनताको सुखदुःखमा सँगसँगै हुनुपर्ने अपेक्षा गरिए पनि उनी जनताको मर्कालाई बेवास्ता गरेर व्यक्तिगत रमाइलोमा लागेको पाइएको छ । सार्वजनिक भएको भिडियोमा उनी काठमाडौंको नाइट क्लबमा रमाइलो गरिरहेका देखिन्छ ।

कञ्चनपुरको निर्वाचन क्षेत्र नम्बर ३ का सांसद रमेश लेखक गृहमन्त्री बन्ने भएपछि काठमाडौं पुगेकी उपमेयर लेखकले नाइट क्लबसम्म पुग्न भ्याएकी छन् । उपमेयर लेखकले आफू बिरामी भएर उपचारका लागि काठमाडौं गएको प्रतिक्रिया दिएकी छन् । तर उनी अस्पतालमा नभई नाइट क्लबमा रमाइलो गर्न गएको भिडियो सार्वजनिक भएको छ ।

कञ्चनपुरमा भएको नेपालकै कीर्तिमानी वर्षाले भीमदत्त नगरपालिकाका हजारौं नगरवासी बाढी प्रभावित भएका छन् । गत हप्ता मात्रै चुर क्षेत्रमा अत्यधिक वर्षा हुँदा भीमदत्त नगरपालिकाको उत्तरी क्षेत्रमा बाढी, डुबान र कटानको समस्या देखिएको थियो ।

विपदका बेला पछिल्ला चुनावमा जितेका जनप्रतिनिधिहरू सहानुभूति बाँड्न नआउँदा नगरवासीले निराशाजनक प्रतिक्रिया जनाएका छन् ।