श्री त्रिभुवन माध्यमिक विद्यालय व्यवस्थापन समितिको अध्यक्षमा राजेन्द्र प्रसाद पण्डित सर्वसम्मत चयन

भीमदत्त नगरपालिका–८ स्थित श्री त्रिभुवन माध्यमिक विद्यालयको व्यवस्थापन समितिको अध्यक्षमा राजेन्द्र प्रसाद पण्डित सर्वसम्मत रूपमा चयन भएका छन्। विद्यालयमा हालै सम्पन्न समिति गठन कार्यक्रममा विभिन्न पक्षको सहमति र समर्थनका साथ पण्डित अध्यक्षमा चयन भएका हुन्।

समिति गठन कार्यक्रममा विद्यालयका प्रध्यानाध्यापक, शिक्षक, अभिभावक प्रतिनिधि तथा स्थानीय समुदायका प्रतिनिधिको उपस्थिति रहेको थियो। विद्यालयको शैक्षिक स्तर उकास्नका लागि अनुभवी र सक्षम नेतृत्व आवश्यक रहेको भन्दै सहभागीहरूले पण्डितलाई सर्वसम्मत रूपमा अध्यक्षमा चयन गरेका हुन्।

नवनिर्वाचित अध्यक्ष पण्डितले विद्यालयको भौतिक पूर्वाधार र शैक्षिक गुणस्तर सुधारमा विशेष ध्यान दिने प्रतिबद्धता व्यक्त गरे। उनले विद्यालयमा अनुशासन, शिक्षण–सीखन प्रक्रियामा सुधार तथा विद्यार्थीहरूलाई प्रतिस्पर्धी बनाउनका लागि आवश्यक योजना अघि बढाइने बताए।

समिति गठनपछि विद्यालय परिवारले नवनिर्वाचित अध्यक्ष पण्डितलाई बधाई दिँदै उनको कार्यकाल विद्यालयका लागि सफल र फलदायी हुने विश्वास व्यक्त गरेका छन्।