“Give Blood, Save Life” सन्देशसहित कुमारी बैंकद्वारा कञ्चनपुरमा रक्तदान कार्यक्रम

कञ्चनपुरको महेन्द्रनगरमा कुमारी बैंक लिमिटेडले आफ्नो २५ औँ वार्षिकोत्सवको पूर्वसन्ध्यामा सामाजिक उत्तरदायित्व अन्तर्गत “Give Blood, Save Life” नारासहित रक्तदान कार्यक्रम आयोजना गरेको छ। बैंकको महेन्द्रनगर शाखा नजिकै पछाडिपट्टि सञ्चालन गरिएको उक्त कार्यक्रममा बैंकका कर्मचारीहरू, विभिन्न बैंक तथा वित्तीय संस्थाका प्रतिनिधिहरू र स्थानीय व्यक्तिहरूको उल्लेखनीय सहभागिता रहेको थियो। मानव जीवनसँग प्रत्यक्ष सम्बन्धित रक्तदान जस्तो पुण्य कार्यमार्फत समाजमा सकारात्मक सन्देश दिन आयोजना गरिएको कार्यक्रममा कुल ३५ जनाले रक्तदान गरेका छन्, जसले भविष्यमा धेरै बिरामी तथा आपतकालीन अवस्थामा परेका व्यक्तिहरूको ज्यान बचाउन सहयोग पुग्ने विश्वास गरिएको छ।

कार्यक्रममा बोल्दै महेन्द्रनगर शाखाका प्रमुख खडक सिंह मडैले रक्तदानलाई जीवनदानसँग तुलना गर्दै बैंकले आफ्नो वार्षिकोत्सवलाई केवल औपचारिकतामा सीमित नराखी समाजप्रति केही योगदान गर्ने उद्देश्यले यस्तो कार्यक्रम आयोजना गरेको बताए। उनले ३५ जनाले गरेको रक्तदान अत्यन्तै महत्वपूर्ण रहेको उल्लेख गर्दै यसले धेरैको जीवन बचाउन मद्दत पुग्ने विश्वास व्यक्त गरे। उनले आगामी दिनमा पनि यस्ता सामाजिक कार्यक्रमलाई निरन्तरता दिने प्रतिबद्धता जनाउँदै सहभागी सम्पूर्ण रक्तदाता र सहयोगीहरूलाई धन्यवाद व्यक्त गरे।
त्यसैगरी, कुमारी बैंककी सुदूरपश्चिम प्रदेश प्रमुख संगीता शर्मा चटोतले बैंकले स्थापनाकालदेखि नै सामाजिक उत्तरदायित्वलाई प्राथमिकतामा राख्दै आएको बताइन्। उनले २५ वर्षको यात्रा केवल उपलब्धि मात्र नभई समाजप्रतिको जिम्मेवारी पनि भएको उल्लेख गर्दै यस्ता कार्यक्रममार्फत समाजलाई सकारात्मक सन्देश दिन खोजिएको स्पष्ट पारिन्। रक्तदानले जीवन बचाउने भएकाले यसलाई व्यवहारमै उतार्नु आवश्यक रहेको बताउँदै उनले कार्यक्रममा देखिएको उत्साहजनक सहभागिताले बैंकलाई थप प्रेरणा दिएको धारणा राखिन्।
कुमारी बैंकले कञ्चनपुर जिल्लामा ६ वटा शाखा र ३ वटा काउन्टरमार्फत सेवा प्रदान गरिरहेको छ भने सुदूरपश्चिम प्रदेशभर २३ वटा शाखा सञ्चालनमा रहेका छन्। त्यसैगरी प्रदेशका १८ स्थानमा एटिएम सेवा उपलब्ध गराउँदै आएको बैंकले आधुनिक बैंकिङ सेवासँगै सामाजिक क्षेत्रमा पनि सक्रिय भूमिका निर्वाह गर्दै आएको छ। रक्तदान जस्ता कार्यक्रमहरूले बैंकलाई केवल वित्तीय संस्था मात्र नभई समाजसँग जोडिएको जिम्मेवार संस्थाका रूपमा स्थापित गर्न सहयोग पुगेको छ। यस्तो अभियानले अन्य संस्थाहरूलाई पनि सामाजिक कार्यमा प्रेरित गर्ने अपेक्षा गरिएको छ।