बन्साह खानेपानीको अध्यक्षमा ईश्वरा कुँवर सर्वसम्मत

झलारी:

शुक्लाफाँटा नगरपालिका–१ गणेशपुरस्थित बन्साह खानेपानी तथा सरसफाई उपभोक्ता समितिको अध्यक्षमा ईश्वरा कुँवर सर्वसम्मत निर्वाचित भएकी छन् ।

साधारण सभाले सर्वदलीय प्रतिनिधित्व हुने गरी कुँवरलाई अध्यक्ष चयन गरेको हो ।

वडामा क्रियाशील ७ राजनीतिक दलमध्ये ६ दलले कुँवरलाई समर्थन गरेको र नेपाली कांग्रेसले आन्तरिक विवादका कारण उम्मेदवार नै तय गर्न नसकेपछि कुँवर सर्वसम्मत भएकी नेकपा माओवादी केन्द्रका प्रतिनिधि नवराज अवस्थीले जानकारी दिए ।

कुँवर नेकपा एमालेकी जिल्ला कमिटी सचिवालय सदस्य हुन् । समितिको उपाध्यक्षमा नेकपा एकीकृत समाजवादीका गंगाबहादुर विष्ट, सचिवमा नेकपा माओवादी केन्द्रका तारादत्त अवस्थी, कोषाध्यक्षमा नेकपा क्रान्तिकारी माओवादीका धनन्जय अवस्थी चयन भएका छन् ।

सदस्यमा राष्ट्रिय प्रजातन्त्र पार्टीका जयदेव भट्ट, राष्ट्रिय जनमोर्चाका विष्णु पन्त तथा गौरी लुहार र लक्ष्मी राना चयन भएका छन् । कांग्रेसका वडा सभापति समेत रहेका निवर्तमान अध्यक्ष सुवर्ण विष्टले समयमै साधारणसभा गर्न नसकेको भनेर आलोचना भएको थियो ।