सामुदायिक वन र सहकारीले गरेको आँखा शिविर ६०० उपभोक्ता लाभान्वित, ११६ जनालाई निःशुल्क चश्मा

कञ्चनपुरको बेदकोट नगरपालिका–१ गणेश आधारभूत विद्यालय पिपलथलामा शनिवार निःशुल्क आँखा शिविर सञ्चालन गरिएको छ ।

वैजनाथ मध्यवर्ती सामुदायिक वन उपभोक्ता समूह हात्तिथला र सिर्जनशील बचत तथा ऋण सहकारी संस्था दैजी सेवा केन्द्रको आयोजनामा आँखा शिविर सञ्चालन भएको हो ।

च्यारिटी हेल्थ फाउन्डेसनको प्राविधिक सहयोगमा आँखा शिविर सञ्चालन गरिएको सहकारीका वरिष्ठ अधिकृत महादेव नाथले जानकारी दिए । शिविरमा ६०० बढी उपभोक्ता लाभान्वित भएका छन् ।

शिविरमा ११६ जनालाई निःशुल्क चश्मा वितरण गरिएको छ । आँखाको शल्यक्रिया गर्नुपर्ने देखिएका ५९ बिरामीको मंगलवार बिहान धनगढी नेत्रालयमा शल्यक्रिया हुने सामुदायिक वनका अध्यक्ष यज्ञराज पनेरुले जानकारी दिए । ‘सामुदायिक वनले संरक्षणका कार्यक्रम सँगसँगै उपभोक्ताको स्वास्थ्य, शिक्षा र आयआर्जनका क्रममा ध्यान दिएको छ,’ अध्यक्ष पनेरुले भने ।

सहकारीले सामाजिक उत्तरदायित्वअन्तर्गत शेयर सदस्यको हितमा आँखा शिविर सञ्चालन गरिएको सहकारीका वरिष्ठ अधिकृत नाथले बताएका छन् ।