काठमाडौँ:

यो वसन्त ऋतुमा विश्वको सर्वोच्च शिखर सगरमाथा आरोहणका लागि कीर्तिमानी आरोहीले प्रयास गरिरहेका छन् ।

पर्यटन विभागका अनुसार ४३ समूहका ४६६ आरोहीले आरोहण अनुमति लिएका छन् । तीमध्ये ९८ जना महिला र ३६८ जना पुरुष रहेको विभागले जनाएको छ ।

विभागको तथ्याङ्कअनुसार यस याममा सगरमाथा वा सगरमाथा आरोहणका लागि नेपालसहित विभिन्न ६५ मुलुकका आरोही रहेका छन् । नेपालबाट १५ आरोहीले आरोहण अनुमति लिएका छन् । यस्तै चीनका ९६, अमेरिकाका ८९ र भारतका ४० आरोहीले आरोहण अनुमति लिएका छन् ।

त्यस्तै हंगेरीबाट ३३, क्यानडाबाट २१, रसियाबाट १८ र बेलायतबाट १५ जनाले अनुमति लिएका छन् । नेपाल पर्वतारोहण सङ्घका पूर्वअध्यक्ष आङछिरिङ शेर्पाले कोभिड–१९

को महामारीयता तिब्बततर्फ (उत्तरपूर्वी रिज रुट) आरोहण अनुमति नभएकाले नेपालबाट आरोहण अनुमति लिने आरोहीको सङ्ख्यामा उल्लेख्य वृद्धि भएको हुन सक्ने बताउनुभयो ।

सगरमाथाको चुचुरोमा पहिलो पटक पाइला टेकेको ७० वर्ष बितिसकेको छ । तेन्जिङ नोर्गे शेर्पा र एडमन्ड हिलारीले सन् १९५३ मे २९ मा सगरमाथाको सफल आरोहण गरेका थिए ।

आठ हजार ८४८ दशमलव ८६ मिटर अग्लो सो हिमालको हालसम्म करीब सात हजार स्वदेशी तथा विदेशी आरोहीले सफल आरोहण गरिसकेका छन् भने तीन सयभन्दा बढीले ज्यान गुमाइसकेका छन् ।

विभागको पर्वतारोहण शाखाका अधिकृत विज्ञान कोइरालाका अनुसार सन् २०२२ मा ४४ समूहका ३२३ आरोहीले सगरमाथा आरोहणका लागि अनुमति लिएका थिए ।

pic: Adrian Ballinger