कैलालीका युवा २ करोड बढीका गरगहनासहित पक्राउ

महेन्द्रनगर :

त्रिभुवन अन्तर्राष्ट्रिय विमानस्थलबाट कैलालीका युवा दुई करोड बढीका गरगहनासहित दुई पक्राउ परेका छन् । प्रहरीले उनीसहित अर्का युवकलाई पक्राउ गरेको छ । सोमबार काठमाडौंबाट श्री एयरलाइन्समा विराटनगर जान लागेका दुई जनाको ब्याग चेक गर्दा ३ किलो तीन सय ६० ग्राम सुनका गरगहनासहित पक्राउ गरेको हो । आन्तरिक उडानबाट विराटनगर जान लागेका कैलालीका ३० वर्षीय बोधराज भण्डारी र धनुषाका ४७ वर्षीय मुरारीराज अधिकारीबाट सुन बरामद भएको विमानस्थल सुरक्षा प्रहरी कार्यालयले जनाएको छ । उनीहरूको ब्याग एक्सरे मेसिनमा देखिएपछि प्रहरीले नियन्त्रणमा लिएको हो । विमानस्थलका अनुसार दुई करोड २४ लाख ९२ हजार ३९७ रुपैयाँ बराबरका गरगहना छन् । थप अनुसन्धानको लागि उनीहरूलाई प्रहरीले राजश्व अनुसन्धान विभाग, हरिहरभवन, पुल्चोकमा पठाएको छ ।