कञ्चनपुरमा एकैदिन नदीमा डुब्दा १ जनाको मृत्यु अर्का बेपत्ता

 महेन्द्रनगर :

कञ्चनपुरमा वुधवार २ जना पानीमा डुब्दा एक जनाको मृत्यु र अर्का एक जना बेपत्ता भएका छन् । सशस्त्र प्रहरीका जवान बेलौरी नगरपालिका–३ खिरिया घर भएका २५ वर्षीय जितबहादुर चौधरी मृत फेला परेका छन् भने, बेदकोट नगरपालिका १० बस्ने ३५ वर्षीय लक्ष्मण पन्त डुबेर बेपत्ता भएको छन् । बेलौरी नगरपालिकामा पर्ने बन्धातालमा डुबेर चौधरीको मृत्यु भएको जिल्ला प्रहरी कार्यालय कञ्चनपुरका प्रहरी नायब उपरीक्षक सिद्धराज न्यौपानेले बताए । उनका अनुसार साथीहरुसंगै बन्धातालमा पौडी खेल्ने क्रममा चौधरी डुबेर बेपत्ता भएका थिए । बेपत्ता भएको दुई घण्टापछि चौधरी मृत फेला परेका हुन् । मृतक चौधरीको शव पोष्टमार्टमका लागि श्रीपुर स्वास्थ्य चौकी बेलौरीको शव गृहमा राखिएको छ । चौधरी हाल कंचनपुरको झलारीस्थित नम्बर ३५ नम्बर गण शैलेश्वरीमा कार्यरत थिए। उनी केही दिनअघि बिदामा घर पुगेका थिए । त्यस्तै, बुधबार साँझ कञ्चनपुरको बेदकोट नगरपालिका स्थित दैजी–बेलडाँडी सडक खण्डसँगै रहेको नहरमा पौडी खेल्ने क्रममा बेदकोट नगरपालिका १० का पन्त डुबेर बेपत्ता भएको प्रहरीले जनाएको छ । बेपत्ता पन्तको खोजी कार्य जारी रहेको जिल्ला प्रहरी कार्यालय कञ्चनपुरका प्रहरी प्रवक्ता एवं प्रहरी नायव उपरीक्षक न्यौपानेले बताए ।