झाेला भाग-३ ( झाेला महिमा अस्तु)

महेन्द्रनगर:

बेग कन्डि प्लास्टिकका, थैला पाेलिथिनका

लेदर् कागज कपडाका, झाेला रेगजिनका

जेउडाकाे कख्यालाे हाेइग्याे, माेटा कपडा पिठ्ठु

अर्खा कानै झाेला धेकि,कसैले नाइ हाे चिड्डु

एक झाेलामा धुप पाेखल, राखिन्छ देवताकि

चाेखाे भाेकाे पिठी लाैछ,हात नाइ लाैना बाँकी

तै झाेलाकि फुलपातिले, देवता खुसि हुन्छ

ताे झाेला पवित्र भण्नान,तम जसाे लागन्छ

एक झाेला किताबै हुन्चे, पड्ड्यालाई ज्ञान दिन्छे

जीवन उज्यालो पाड्ड ,सबैलाई ध्यान दिन्छे

एक झाेला पल्टनकि हुन्चे, देशको नउँ हुन्छ

ताे बाेक्द्या जवान हुन्छ,इज्जत पउँ भन्च

एक झाेला पार्टीकि हुन्चे, पार्टीको नउँ हुन्छ

नेताका कानकि झाेला,जम्माइ मै खउँ भन्छ

एक झाेला नेताकि हाेइ गै,कार्यकर्ताः कान

अइतिर हात हल्लाई नेता,गद्दाे ठूली सान

कसैका झाेलामा गाेला, कसैका छन् खाेला

अघा भारि पछा भारि,कसैका दुई झाेला

कसै देश गाली हुन्चे, कसैइ देशैइ बाेली

जाेगीका झाेलाकाे मात्तर,नउँ पडिछ झाेली

एक झाेला दलालै हुन्चे , एइ घर उइ घर

वैध अवैध सब झाेलाइनी,ताे उपुद्दुरि गर

सङ्कटकाल झाेला धेक्या, बम हाेलाे भणन्थ्या

हातजिन लगा भन्त्या तैलाइ,सब मान्स डरन्थ्या

काेइ झाेला मयालु हुन्चे, मायाको अाहार

जिल्फि मिठाइँ गाेला मिश्री,खनाकि बहार

काेइ झाेला चिटिक्क राम्री, काेइ मैलि गन्अाैन्या

काेइ झाेला सहारा हुन्चे,काेइ हुन्चे तर्काैन्या

काेइ झाेला राष्ट्रकि सान, काेइ हुन्चे देशघाती

देशघातीका हात पण्या,जीवनकि बर्बादी

जाे हुन्चे देशकि प्यारी, स्वाभिमानी झाेला

तै झाेला बिसर्ग्या व्यर्थ ,याे मनुष्य चाेला

एक झाेला धर्मका नउँमा, कृष्ण अवतारकि

अर्खि झाेला रूप्प्याकि भै,सेठ साैकारकि

एक झाेला प्रियाकि हुन्छे, लभ लेटरवालि

साथ छुट्याे प्रियकाे भुण्या,सुइना धेकि झालि

एक झाेला घरिनाकि हुन्चे, सिङ्गार पटारकि

जाँत झन्ज्या काँजर लाैन्या,हतार पतारकि

एक झाेला अफनि हाेइगै,अफनाे समान राख्द्या

जति ताे पुरानी हुन्चे,उति माया लाग्द्या

काेइ झाेला ठण्निएइ हुन्चे, धाे धन्न तताैनी

काेइ झाेला बगस हाल्लि,काेइ भाइर पठाैनी

झाेलानका अनेक रङ्ङ, काेइ राता काेइ काला

झाेलाका अनेक साइना ,काेइ भिना काेइ साला

वारिपारि समुन्द्र पारि, काेइ मथि काेइ तल

बहुल झाेला बहुरङ्ङि,पछ्याण्नाइ अलमल

काेइ बाेक्दा देवताकि झाेला ,काेइ नेतानकि बाेक्दा

काेइ झाेला ठिटिनकि बाेक्दा,काेइ ठिटानकि बाेक्दा

झाेलाइ कि विवाद हुन्चे, झाेलाइमा वाद हुन्छ

तीन लाेक चाैध भुवन,झाेलाइकाे बात हुन्छ

झाेलाइमा अमृत हुन्च, झाेलाइमा बिष हुन्छ

झाेलाइनि गेदानका कपडा,स्कुलाे फिस हुन्छ

निका गट्टा पाेथि पताडा,कर्म सब झाेलामा

अनेक जात अनेक भाषा,धर्म सब झाेलामा

पुराना पुर्खाका झाेला, खितिहाल्या खाेलाइनि

विकास रे समृद्धि देशकि,ताे पनि झाेलाइनि

झाेल्यानैकि मालामाल, झाेल्यानै कि सान

देशका बजेटै झाेला,झाेल्यानैका कान

पद प्रतिष्ठा कमाैना कि, झाेला समाैन पण्याे

जाे झाेला बाेकन्छाै बाेक,रूप्प्या कमाैन पण्याे

झाेला मान झाेला सान, झाेलाइ पुज्ज्या गर

झाेला हाे जीवनाे मार्ग ,झाेलाइ सुच्च्या गर

झाेलाकि अनाैठी लिला, किसुनजिका जसि

झाेलाका जाडपति काेइनाइ,कै का भाग कसि

फाटी हाै कि पुरानी हाै, झाेलालाई जिन हेप

पिठिउनि काेखिमणि हात,जाँ चेपन्छाै चेप

झाेलाकाे महिमा अपार , बर्णन तीनै लाेक

बाेक्दुइ छ एक झाेला हमले,

मन पडेकि बाेक *इति झाेला पुराणम् अस्तु