सडकबाट खोलामा खस्यो, ४ जनाको घटनास्थलमै मृत्यु, ६ घाइते

रोल्पा । शहीद मार्ग अन्तर्गत रोल्पाको माडी गाउँपालिका वडा नम्बर २ जलजलामा बिहीबार बेलुकी बस दुर्घटनामा परी चार जनाको घटनास्थलमै मृत्यु भएको छ।

तीन जना पुरूष र एक महिला गरी चार जनाको मृत्यु भएको रोल्पाका प्रहरी प्रमुख डिएसपी नरेशराज सुवेदीले बताए । उनका अनुसार मृतकको सनाखत हुन सकेको छैन । थप ६ जना घाइतेलाई उद्धार गरी सुनिल स्मृति अस्पताल घर्ती गाउँमा पुर्‍याएको डिएसपी सुवेदीले बताए।

उनका अनुसार दाङको घोराहीबाट रोल्पाको थवाङतर्फ जाँदै गरेको ना ३ ख ५५१८ नम्बरको बस बेलुका साढे ६ बजे दुर्घटनामा परेको हो । बस सडकबाट एक सय मिटर तल माडी खोलामा खसेको छ ।

दुर्घटनास्थलभन्दा तीन किलो मिटर अगाडि रहेको प्रहरी चेक पोष्टका अनुसार बसमा १० जना यात्रु सवार रहेका थिए।

त्यो बीचमा अरू कोही यात्रु थपिएको वा झरेको भन्ने यकिन भइनसकेको प्रहरीले जनाएको छ।

घटनास्थल अँध्यारो भएको हुँदा अरू यात्रु पनि घाइते छन् कि भनेर खोजी कार्य जारी रहेको पनि डिएसपी सुवेदीले जानकारी दिए।