सुदूरपश्चिम प्रदेश महामन्त्री पदमा भट्टको उम्मेदवारी

महेन्द्रनगर 

सुदूरपश्चिम प्रदेश कार्यसमितिको अधिवेशनमा कञ्चनपुरका नेता तथा महाधिवेशन प्रतिनिधि चिन्तामणि भट्टले महामन्त्री पदमा उम्मेदवारी दिने भएका छन् । बैतडी र कञ्चनपुरको पार्टी राजनीतिमा लामो समयदेखि क्रियाशील भट्टले महामन्त्रीमा उम्मेदवारी दिने तयारी गरेका हुन् । भट्ट कांग्रेसभित्र सभापति शेरबहादुर देउवा निकट मानिन्छन् । पार्टीका नेता–कार्यकर्तासँगको छलफलपछि प्रदेश महामन्त्रीमा उम्मेदवारी दिने निष्कर्षमा पुगिएको नेता भट्टले जानकारी दिए । हालै भएको महाधिवेशन प्रतिनिधिको निर्वाचनमा समेत भट्ट कञ्चनपुरको २ नम्बर निर्वाचन क्षेत्रबाट लोकप्रिय मतका साथ विजयी भएका थिए । भट्टले राजनीतिक यात्रा बैतडीको सनातन धर्म माविमा नेविसंघ इकाई अध्यक्ष भएर सुरु गरेका हुन् । उनी २०४२ सालमा नेपाली कांग्रेसद्वारा गरिएको सत्याग्रहमा नेविसंघ बैतडीको तर्फबाट सहभागी भएका थिए ।