बालुवा बोकेको ट्याक्टरमा लुकाई छिपाई लगेको अबस्थामा सालको काठ बरामद

 महेन्द्रनगर:

कैलालीको गोदावरी नगरपालिका –७ गौडीस्थित सडकखण्डमा पश्चिमबाट पुर्वतर्फ जाँदै गरेको से.१ त. ८८६७ नम्बरको बालुवा बोकेको ट्र्याक्टरबाट सालको काठ बरामद गरिएको छ । बालुवा बोकेको ट्र्याक्टरबाट सालको काठ बरामद गरिएको जिल्ला प्रहरी कार्यालय कैलालीले जनाएको छ । शुक्रबार जिल्लाका अस्थायी प्रहरी पोष्ट श्रीपुर कैलालीबाट खटिएको प्रहरी टोलीले चेकजाँच गर्दा बालुवाभित्र लुकाई छिपाई ओसारपोसार गरिरहेको अवस्थामा सालको काठ फेला पारेको हो । उक्त ट्र्याक्टरबाट ५५ थान सालको काठ (कडी) फेला पारी आवश्यक कारबाहीको लागि सब डिभिजन वन कार्यालय अत्तरीया पठाएको जिल्ला प्रहरी कार्यालय कैलालीले बताएको छ । चालक गोदावरी–७ तेकुल्लाका ३६ वर्षीय हर्क कुमाललाई नियन्त्रणमा लिइएको बताइएको छ ।