खलंगामा विगत ४ दिनदेखी खानेपानीको हाहाकार

दार्चुला । दार्चुलाको खलंगामा विगत ४ दिनदेखी खानेपानीको हाहाकार भएको छ । दार्चुला सदरमुकाम खलंगास्थित महाकाली नगरपालिका–४ र ५ मा खानेपानीको समस्या भएको हो । विगत चार दिनदेखि बजार क्षेत्रमा पानीको आपूर्ती बन्द भएपछि खानेपानीको हाहाकार भएको खेमराज जोशीले बताएका छन् ।
सडक निर्माणका क्रममा मालबेला क्षेत्रमा खानेपानीको लाईन अवरुद्ध भएको भएपनि अहिलेसम्म मर्मत नगरिदा खानेपानी आपुर्ती बन्द भएको थियो । पाँच दिनदेखि धारामा खानेपानी नआएपछि होटल व्यवसायीका साथै आम उपभोक्ता समस्यामा परेका छन् ।
महाकाली नदीबाट बोकेर होटेलमा खानेपानीको व्यवस्थापन गर्नुपरेको होटल व्यवसायीहरुले गुनासो गरेका छन् । खलंगा बजारमा विगतदेखि नै खानेपानीको समस्या भोग्नुपरेको उपभोक्ताहरुको गुनासो छ । नगरबासीले खानेपानी माग गर्दै पटकपटक नगरपालिका कार्यालयमा ज्ञापनपत्र बुझाएर ध्यानकर्षण गराएपनि खानेपानीको उचित व्यवस्थापन हुन सकेको छैन् ।