राष्ट्रपति शैक्षिक सुधार कार्यक्रमका लागि सुदुरपश्चिममा ६ सय ६ विद्यालय छनोट

महेन्द्रनगर:

राष्ट्रपति शैक्षिक सुधार कार्यक्रमका लागि सुदुरपश्चिममा ६ सय ६ विद्यालय छनोटमा परेका छन् । प्रदेशका १ सय ४१ विद्यालयमा ४ कोठे भवन, १ सय ७९ विद्यालयमा दुई कोठे भवन, २ सय ७० विद्यालयमा आइसीटी व्यवस्थापन, ८ विद्यालयमा प्राविधिक ल्याब र विद्यालयमा नयाँ प्राविधिकमा एक विद्यालय गरी ६ सय ६ विद्यालय छनोट भएका हुन् । सोमबार शिक्षा, विज्ञान तथा प्रविधि मन्त्री देवेन्द्र पौडेलको अध्यक्षतामा बसेको बैठकले प्रदेशका ६ सय ६ विद्यालय छनोट गरेको हो । शिक्षा विज्ञान तथा प्रविधिमन्त्री देवेन्द्र पौडेलका अनुसार ४ कोठे भवन निर्माणका लागि प्रतिविद्यालय ३६ लाख, दुई कोठे भवन निर्माणका लागि १८ लाख, आइसीटी ल्याब व्यवस्थापनका लागि ६ लाख ५० हजार, नयाँ प्राविधिक धार सञ्चालनका लागि ल्याब व्यवस्थापन तथा शिक्षण सहयोग अनुदान छुटयाईए्को बताए ।