आफन्तलाई हत्या गरेको आरोपमा ३ जना युवक पक्राउ

महेन्द्रनगर । डडेल्धुरामा आफन्तलाई हत्या गरेको आरोपमा ३ जना युवक पक्राउ परेका छन् । हत्या आरोपमा प्रहरीले आलीताल गाउँपालिका ८ बस्ने अन्दाजी १८ वर्षीय पुजन लोहनी परशुराम नगरपालिका–१२ मा बस्दै आएका आशिष बराल, र परशुराम नगरपालिका–१२ बस्ने अटो रिक्सा चालक तेजबहादुर बिकलाई पक्राउ गरेको हो ।
डोटीको दिपायल सिलगढी नगरपालिका ३ का ३५ वर्षीय बसन्त सिजापतिको कुटपिट गरी हत्या आरोपमा उनीहरु पक्राउ परेका हुन् । जिल्ला प्रहरी कार्यालय डडेल्धुराका अनुसार सोमबार बिहान आलीताल गाउँपालिका–४ मा घाइते अवस्थामा भेटिएका सिजापतिको उपचारका क्रममा जोगबुढा अस्पतालमा मृत्यु भएको हो ।
सिजापतिको हत्यामा संलग्न भएको उनीहरुले मदिरा सेवनपछि आपसी विवादका क्रममा सिजापतिमाथि कुटपिट गरेर राति करीब १२ बजेको समयमा अटो रिक्सामा बोकेर उनलाई घाइते अवस्थामा आलीताल गाउँपालिका ४ मा फालेका थिए ।
स्थानीयले सिजापति घाइते अवस्थामा फेला पारेपछि प्रहरीलाई खबर गरेका थिए। प्रहरीले उनलाई जोगबुढा अस्पताल पु¥याए पनि उपचारकै क्रममा सोमबार उनको मृत्यु भएको थियो । पक्राउ परेका उनीहरुविरुद्ध कर्तव्य ज्यान मुद्दा दर्ता गरेर अनुसन्धान भइरहेको प्रहरीले जनाएको छ । हत्या आरोपमा पक्राउ परेका बराल र लोहनी मृतक सिजापतिका नातेदार हुन् भने अटो रिक्सा चालक उनीहरुको साथी भएको खुलेको छ ।