७ महिना देखी थुनिएको कर्णाली, कर्णाली करिडोरको भाग जोखिममा

महेन्द्रनगर । बाजुराको जुड्डीमा कर्णालीको केही भाग ७ महिना देखी थुनिएपछि जोखिम बढदै गएको छ । साउनको अन्तिम साता कर्णाली थुनिएको थियो । कर्णाली थुनिएको ७ महिना भइसक्दा पनि त्यसलाई खुलाउने कुनै पहल भएको छैन् । अहिले पनि कर्णाली ३ किलोमिटर जति भाग थुनिएको जगन्नाथ गाउँपालिका रोजगार संयोजक लक्ष्मण जोशीले वताएका छन् ।
स्वामिकार्तिक खापर गाउँपालिका १ रुडि गाउँको तल र छुद्दरी गाउँको नजिकै सुख्खा पहिरो बगेपछि कर्णालीको केही भाग थुनिएको थियो । भदौ महिनामा ५ किलोमिटर नै थुनिएको थियो, बिस्तारै केहीभाग खुलेपछि ३ किलोमिटरमा भने अहिले पनि पानि थुनिएको जोशीले वताए ।
कर्णालीको केही भाग थुनिएपछि जगन्नाथ गाउँपालिकाले निर्माण गरिरहेको खेलकुद मैदान समेत उच्च जोखिममा रहेको छ । त्यस्तै कर्णाली करिडोरको भाग पनि जोखिममा रहेको छ । जगन्नाथ गाउँपालिका २ मा रहेको जुड्डीको पारी पट्टि स्वामीकार्तिक खापर गाउँपालिका १ को छुद्ररी नजिकैको भिर फुटेर कर्णाली नदीमा ढुगां, माटो कर्णाली नदी खसेको थियो । जगन्नाथ गाउँपालिकाको केन्द्रको पारि पटि पहिरो बग्न थालेपछि गाउँपालिकाको कार्यलय, प्रहरी चौकी लगायतको बस्ति जोखिममा रहेको जगन्नाथ गाउँपालिकाले जनाएको छ ।
७ महिना सम्म कर्णाली नखोलिनुले अझै उच्च जोखिम रहेको जगन्नाथ गाउँपालिका अध्यक्ष कालि बहादुर शाहिले वताएका छन् । थुनिएको ठाँउमा निकै साधुरो भएर नदि बगिरहेको छ, पहिरो रोकिएको भएपनि थुनिएको नदि भने नघटेको शाहिले वताए ।