सामुदायिक वनमाथि छानबिन, अनुसन्धान अधिकृत सहितको टोली परिचालन

महेन्द्रनगर । कञ्चनपुर र कैलालीका सामुदायिक वनको छानबिन थालिएको छ । वैज्ञानिक वन व्यवस्थापन लागुभएका कञ्चनपुर–कैलालीका सामुदायिक वनहरुमा अख्तियार दुरुपयोग अनुसन्धान आयोगको कार्यालयले सुदूरपश्चिममा दुई टोली परिचालन गरेर छानबिन थालेको हो ।
सोमबार कञ्चनपुर र कैलाली पुगेका अनुसन्धान अधिकृत सहित २–२ जनाको टोलीले मंगलबार विहानैदेखि स्थलगत छानविन थालेको अख्तियार दुरुपयोग अनुसन्धान आयोगको कार्यालय महेन्द्रनगरका सुचना अधिकारी चन्द्रकान्त बस्नेतले जानकारी दिएका छन् ।
वैज्ञानिक वन व्यवस्थापन लागुभएका सामुदायिक वनमा चरम आर्थिक अनियमितता भएको, आदेश विपरीत रुख कटान भएको भन्ने आयोगको प्रधान कार्यालय टंगालमा परेको उजुरीका आधारमा अख्तियारले छानबिन थालेको हो ।
गत वर्ष मात्रै वैज्ञानिक वन व्यवस्थापन लागू भएका कञ्चनपुर र कैलाली जिल्लाका सामुदायिक वनमा व्यापक आर्थिक अनियमितता भएको संघीय संसदीय उपसमितिको प्रारम्भिक अध्ययनले पनि देखाएको थियो ।