माओवादी निकट क्रान्तिकारी संगठन विस्तारमा

कञ्चनपुर:
नेकपा माओवादी केन्द्र निकट अखिल क्रान्तिकारीले कञ्चनपुरमा संगठन विस्तारमा जुटेको छ । आगामी स्थानीय तहको चुनावमा माओवादी केन्द्रलाई विजयी गराउनका लागि संगठन विस्तार गरिरहेको क्रान्तिकारीका नेताहरुले बताएका छन ।

अखिल क्रान्तिकारीले संगठन सुदृढिकरण अभियान अन्र्तरगत बेदकोट र शुक्लाफाँटा नगरका क्याम्पस, विद्यालयमा संगठन विस्तार गरेको अखिल क्रान्तिकारी कञ्चनपुर कार्यालय सदस्य डिबी धामी(अबिरल)ले बताए । उनका अनुसार शुक्लाफाँटा नगर झलारीको कृष्ण बैजनाथ बहुमुखी क्याम्पसमा व्यवस्थापन संकायतर्फ भीम ब. धामी र शिक्षा तर्फ भावना विष्टको अध्यक्षमा संकाय स्तरको कमिटि विस्तार गरिएको छ । बेदकोट नगर सिसैयाको भुवनेश्वरी मावि सियैयामा बिनय बोहराको अध्यक्षतामा इकाई कमिटि विस्तार गरिएको छ ।

अखिल क्रान्तिकारी कञ्चनपुरका अध्यक्ष कैलाशचन्द्र गिरीले संगठन विस्तार नियमित कार्यक्रम समेत भएको बताउँदै उनले आउँदै गरेको आगामी चुनावका लागि तयारी भएको बताए । ‘पार्टी जिताउने र परिर्वतनकारी शक्तिका पक्षमा शिक्षित युवा जमातलाई एकजुट गराउने अभियान पनि हो, ‘उनले भने, ‘अभियान उपलब्धी मुलक भईरहेको छ , जिल्लाका सबै पालिकामा क्रान्तिकारी युद्धस्तरमा खटिएका छन ।’