साइकल यात्रीलाई ठक्कर दिएर भागेको कारबाट लागुऔषध फेला

कञ्चनपुरः

कञ्चनपुरमा लागुऔषधसहित २ जना पक्राउ परेका छन् । बिहीवार महेन्द्रनगरदेखि धनगढी आउने क्रममा पूर्वपश्चिम राजमार्ग अन्तगरत डाउना होटल नजिक साइकल यात्रीलाई ठक्कर दिएर भाग्दै गरेको कारबाट लागुऔषधसहित उनीहरु पक्राउ परेका हुन् ।
पक्राउ पर्नेमा कारचालक भारतको शिव दुर्गा बिहार लम्करपुर सुरजकुण्ड फरिदाबाद हरियाणा बस्ने २२ वर्षीया रोहित सिंह र उक्त गाडीमा सवार मानपुर उत्तर प्रदेश बस्ने २३ वर्षीय रजत सिंह रहेका छन् । उनीहरुको साथबाट ०.२५ ग्राम खैरो हेरोइन र ४.४८ ग्राम गाँजा फेला परेको जिल्ला प्रहरी कार्यालय कञ्चनपुरले जनाएको छ ।
रोहितले चलाएको भारतीय डीएल३सीसीएस९४७६ नम्बरको कारले बेदकोट नगरपालिका–७ बस्ने १५ वर्षीय साइकलयात्री पदम भट्टलाई ठक्कर दिएको थियो । उनलाई ठक्कर दिएर भाग्दै गर्दा प्रहरी चौकी दैजीबाट खटिएको टोलीले कारलाई नियन्त्रणमा लिएको प्रहरीले जानकारी दिएको छ ।