सुदूरपश्चिममा विपत्तिको चपेटामा ४० ज्यान, दुई अर्बभन्दा बढीको क्षति

धनगढी:
सुदूरपश्चिम प्रदेशमा आर्थिक वर्ष २०८१÷८२ को अवधिमा प्राकृतिक तथा अन्य विपत्तिका कारण ४० जनाले ज्यान गुमाएका छन्। प्रदेश आपत्कालीन कार्यसञ्चालन केन्द्रका अनुसार, ज्यान गुमाउनेमा १९ पुरुष र २१ महिला रहेका छन्।
केन्द्रको तथ्यांकअनुसार, सबैभन्दा बढी ११ जनाको मृत्यु चट्याङबाट भएको छ भने पहिरोका कारण सात, बाढीबाट छ, जनावर आक्रमणबाट चार र आगलागीमा तीन जनाले ज्यान गुमाएका छन्। अन्य दुर्घटनामा थप छ जनाको मृत्यु भएको छ।
विपत्तिपछि ८८ पुरुष र १११ महिला गरी १९९ जना घाइते भएका छन्। साउन १ देखि असार ३२ सम्मका बीचमा मात्रै ७९७ विपद्का घटना दर्ता भएका थिए। ती घटनाले २३८० परिवार प्रत्यक्ष प्रभावित बनाएको छ।
विपत्तिका कारण १७२ घरमा आंशिक र १०७ घर पूर्ण रूपमा ध्वस्त भएका छन्। साथै, १०१ गोठ र ४८२ चौपायामा क्षति पुगेको प्रदेश सरकारको विवरणमा उल्लेख छ।
मूल्यांकनअनुसार, विभिन्न घटनाबाट ३७ करोड १८ लाख रुपैयाँ बराबरको भौतिक तथा आर्थिक क्षति भएको छ।
प्रदेश सरकारले आगामी मनसुनमा अझै ठूलो प्रभाव पर्ने अनुमान गर्दै विपत् प्रतिकार्य योजना तयार पारेको छ। आन्तरिक मामिला तथा कानुन मन्त्रालय अन्तर्गतको यो योजना अन्तिम चरणमा रहेको र समितिबाट पारित हुन बाँकी रहेको मन्त्रालयका सूचना अधिकारी दीपेन्द्रसिंह विष्टले जानकारी दिए।
उनका अनुसार यो वर्ष मनसुनका कारण दुई लाख २७ हजारभन्दा बढी नागरिक र ४२ हजारभन्दा बढी घरधुरी प्रभावित हुने पूर्वानुमान गरिएको छ।