विश्व मानवीय दिवसमा महेन्द्रनगरमा रक्तदान : कालिका लायन्स क्लबको अभियान

कञ्चनपुरः
कञ्चनपुरको महेन्द्रनगरमा विश्व मानवीय दिवसको अवसर पारेर कालिका लायन्स क्लब महेन्द्रनगरले आयोजना गरेको रक्तदान कार्यक्रम भाद्र ३ गते शनिबार सम्पन्न भएको छ। महेन्द्रनगरको संविधान चोकमा बिहानैदेखि सुरु भएको कार्यक्रममा १५ जनाले रक्तदान गरेका छन्। कार्यक्रममा क्लबकी अध्यक्ष हेलेन श्रेष्ठको अध्यक्षता र प्रमुख अतिथि जगदिश भट्टको उपस्थितिमा सम्पन्न भएको हो।

कार्यक्रम क्लबका पदाधिकारीहरूले जनाएअनुसार रक्तदान अभियानको उद्देश्य समाजमा मानवता र सेवाभाव फैलाउनु रहेको थियो। विश्व मानवीय दिवसको सन्देशलाई आत्मसात् गर्दै क्लबले यसअघि पनि स्वास्थ्य शिविर, वृक्षारोपण, निःशुल्क परामर्श र राहत वितरणजस्ता कार्यक्रम सञ्चालन गर्दै आएको छ। यस पटक भने क्लबले रक्तदानलाई मुख्य अभियानका रूपमा अघि सारेको हो।

अध्यक्ष हेलेन श्रेष्ठले उद्घाटन मन्तव्यमा मानवताको महान कार्य भनेकै अरुलाई जीवन दिने बाटो खोल्नु हो भन्दै रक्तदानलाई केवल स्वास्थ्य सेवा नभई सामाजिक उत्तरदायित्वका रूपमा बुझ्नुपर्नेमा जोड दिइन्। उनले प्रत्येक थोपा रगत कसैको जीवन बचाउन सहयोगी हुने विश्वास व्यक्त गरिन्।

प्रमुख अतिथि जगदिश भट्टले विश्व मानवीय दिवसको महत्वबारे चर्चा गर्दै रक्तदानलाई जीवनको महान दान भने। उनका अनुसार नेपालमा हरेक दिन सयौँ बिरामीलाई रगतको आवश्यकता पर्छ, तर आपतकालीन अवस्थामा पर्याप्त रगत नपाउँदा अकालमा ज्यान गुमाउने अवस्था आउने गरेको छ। यस्तो संवेदनशील अवस्थालाई रोक्न रक्तदान कार्यक्रम अपरिहार्य हुने उनको भनाइ थियो।

रक्तदान कार्यक्रममा युवादेखि मध्यम उमेर समूहका मानिसहरूको उत्साहजनक सहभागिता देखियो। कतिपय सहभागीले पहिलो पटक रगत दिएका थिए भने कतिपय यसअघि नै नियमित रक्तदाता भइसकेका थिए।

कुल १५ जनाले रक्तदान गरेको जानकारी अध्यक्ष हेलेन श्रेष्ठले दिएकि छन्। संविधान चोकमा बिहान १० बजेदेखि दिउँसो २ बजेसम्म रक्तदान कार्यक्रम सञ्चालन गरिएको थियो। रक्तदाताहरुलाई स्वास्थ्य परीक्षण गरी जुस दिएर घर पठाइएको थियो।

कालिका लायन्स क्लब महेन्द्रनगर कञ्चनपुरले विगत लामो समयदेखि समाजसेवामा उल्लेख्य योगदान दिँदै आएको छ। विशेषगरी शिक्षा, स्वास्थ्य, वातावरण र राहत क्षेत्रमा क्लब सक्रिय रहँदै आएको छ। यस पटकको रक्तदान कार्यक्रमलाई क्लबले आफ्नो वार्षिक योजनाअन्तर्गतको महत्वपूर्ण अध्यायका रूपमा लिएको छ।

नेपाल रेडक्रस सोसाइटीका तथ्यांकअनुसार नेपालमा हरेक वर्ष ३ लाखभन्दा बढी रगतको आवश्यकता पर्छ तर संकलन हुने रगत करिब २ लाख ५० हजार मात्र हुन्छ। बाँकी माग पूरा गर्न कठिनाइ हुने गरेको छ। विशेषगरी दुर्घटना, शल्यक्रिया, गर्भवती महिला र रक्तअल्पता भएका बिरामीलाई तत्काल रगत आवश्यक पर्ने हुँदा रक्तदान जीवन रक्षाको मुख्य आधार बन्ने गरेको छ।

संविधान चोकमा आयोजित कार्यक्रममा स्थानीय नागरिकको ठूलो भिड देखिएको थियो। धेरैले कार्यक्रममा उपस्थित भई रक्तदातालाई हौसला व्यक्त गरे। स्थानीय व्यवसायी दिनेश श्रेष्ठले शहरकै बीचमा आयोजना गरिएको यो कार्यक्रमले सबैलाई सन्देश दिएको बताए।

कालिका लायन्स क्लबले आगामी दिनमा अझ व्यापक रक्तदान कार्यक्रम सञ्चालन गर्ने योजना बनाएको छ। क्लबका सचिव प्रिती धिर भण्डारीका अनुसार, विद्यालयस्तरमै रक्तदानको महत्वबारे सचेतना फैलाउने र युवा पुस्तालाई नियमित रक्तदाता बनाउन ‘एक वर्षमा दुई पटक’ अभियान सञ्चालन गर्ने तयारी भइरहेको छ। साथै, क्लबले स्वास्थ्य शिविर, वातावरण संरक्षण, आँखा उपचार शिविर, विपन्नलाई सहयोग र वृक्षारोपण अभियानलाई निरन्तरता दिने जनाएको छ।

विश्व मानवीय दिवसको अवसरमा गरिएको रक्तदान कार्यक्रमले महेन्द्रनगरवासी मात्र नभई सम्पूर्ण कञ्चनपुरवासीलाई मानवता र सेवाभावको सन्देश दिएको छ। १५ जनाले दिएको रगत थुप्रै बिरामीका लागि जीवनदायी बन्न सक्छ। रगत दिनु भनेको केवल शरीरको अंश दान गर्नु होइन, अपरिचितलाई जीवन उपहार दिनु हो। यसरी कालिका लायन्स क्लब महेन्द्रनगरले सुरु गरेको अभियान मानवताको उज्यालो यात्रामा ठूलो योगदान पु¥याएको देखिन्छ।